Այսօր՝ հունվարի 31-ին, անցկացվել է ազգային անվտանգության խորհրդի նիստ, որի ընթացքում քննարկվել է ՀՀ զինված ուժերի 2018-2024 թթ. արդիականացման ծրագրի նախագիծը: Այս մասին հայտնում է ՀՀ նախագահի կայքը:
Անվտանգության խորհուրդը քննարկման արդյունքում հավանություն է տվել ներկայացված մոտեցումներին և հանձնարարել կառավարությանը՝ սահմանված կարգով ընթացք տալ դրանց ու ներկայացնել նախագահի հաստատմանը:
Առաջին հարցի մասին խորհրդի անդամներին զեկուցել է պաշտպանության նախարար Վիգեն Սարգսյանը:
Նախագահն իր մոտեցումներն ու գնահատականներն է ներկայացրել պաշտպանության նախարարության կողմից մշակված՝ ՀՀ ԶՈւ արդիականացման ծրագրի նախագծի վերաբերյալ, որի մշակման մասին հանձնարարականը Նախագահը տվել էր 2017 թվականի հոկտեմբերի 24-ին: 2018-ի տարեսկզբին նախագահի ներկայությամբ ծրագրի նախագիծը մանրամասն քննարկվել է նաև պաշտպանության նախարարությունում:
«…Այսօր, իմ կարծիքով, առկա է ծրագիր, որը լավ մշակված է, թիրախներ կան, կան ցուցանիշներ, և որ ամենակարևորն է՝ կան նաև ֆինանսական հաշվարկներ: Ասածս չի նշանակում, որ հիմա մենք չենք կարող այս ծրագրի մեջ փոփոխություններ մտցնել, իհարկե, կարող ենք, դրա համար էլ ներկայացված է անվտանգության խորհրդի հաստատմանը, այնուհետև արդեն ընթացք կտանք»,-ասել է Սերժ Սարգսյանը:
Նիստում հավանություն է տրվել սահմանադրական բարեփոխումների իրավական ապահովման գործընթացից ձեռք բերված արդյունքներին և հանձնարարվել է կառավարությանը՝ սահմանված կարգով շարունակել դրանց իրականացումն ու ապահովել տրամաբանական ավարտին հասցնելու գործընթացը:
2017-ի նոյմեբերի 1-ին պաշտպանության նախարարը ներկայացրել էր յոթնամյա ծրագրի հիմնական ուղղությունները, որոնք են՝
- օրենսդրական դաշտի ձևավորում;
- զինված ուժերի զարգացման, մարտունակության բարձրացման, սպառազինության և ռազմական տեխնիկայի արդիականացման համալիր ծրագիր;
- կառավարման արդյունավետության բարձրացում;
- մասնագիտական գրավչության բարձրացում (այդ թվում՝ ռազմական կրթություն);
- զինծառայողների սոցիալական պաշտպանության խնդիր. բնակարանավորում, բուժսպասարկում;
- «Վետերենանների և զորացրվող զինծառայողների հարցեր»;
- Զոհվածների և հաշմանդամների կողքին կանգնելու կարողություն:
Իսկ ավելի ուշ՝ արդեն 2018-ի հունվարի 28-ին, ՀՀ նախագահը հայտնել էր, որ այն ընդունվել է: