Հունվարի 26-ին ռուսաստանյան «Իզվեստիա» կայքը հայտնում է, որ, Պենտագոնից իրենց տված մեկնաբանության համաձայն, ԱՄՆ-ն կշարունակի զինել «Սիրիայի դեմոկրատական ուժերին» (SDF)` չնայած Սիրիայի քրդերի դեմ Թուրքիայի ծավալած ռազմագործողությանը: Ըստ ռուսաստանյան կայքի՝ Պենտագոնից իրենց որոշումը հիմնավորում են նրանով, որ քրդական ուժերը շարունակում են պայքարել «Իսլամական պետություն» ահաբեկչական խմբավորման դեմ:
Սիրիայի քրդերը՝ ԱՄՆ տրամադրած զինտեխնիկայով. (արխիվ)
Նշված «Սիրիայի դեմոկրատական ուժերը» ԱՄՆ օժանդակությամբ Սիրիայում ստեղծված զինուժ է, որի հիմնական կորիզը կազմում են նույն Սիրիայի քրդերի «Ինքնապաշտպանության ջոկատները» (YPG): Թուրքիան հենց այդ ուժերին է համարում «ահաբեկչական» և ռազմագործողություն է սկսել նրանց դեմ Սիրիայի տարածքում:
Միացյալ Նահանգները Սիրիայի քրդական ուժերին զինում և մարզում է ակտիվորեն դեռևս 2015 թ. վերջերից սկսած՝ նրանց օգտագործելով «Իսլամական պետության» դեմ պայքարում: Չնայածա Թուրքիայի հետևողական դժգոհ կեցվածքին՝ ԱՄՆ-ն մշտապես զենքի նոր խմբաքանակներ է ուղարկել քրդերին:
Հիշեցնենք, որ հունվարի 24-ին Թուրքիայի նախագահի հետ հեռախոսազրույցում, ըստ Սպիտակ Տան կայքի հաղորդագրության, ԱՄՆ նախագահ Դոնալդ Թրամփը հորդորել էր սահմանափակել Թուրքիայի ռազմագործողությունը և խուսափել քայլերից, որոնք կարող են բերել ամերիկյան ու թուրքական ուժերի միջև բախումների:
Աֆրինի գործողության հետ կապված մանրամասները՝ այստեղ:
Իրադրությունն Աֆրինում հունվարի 24-ին՝ ըստ բաց աղբյուրների տվյալների. Աղբյուր՝ ©Syria Live Map