ՀՀ կառավարությունը ձևավորում է հանձնաժողով, որը եզրակացնելու է, թե գիտության և կրթության բնագավառում նշանակալի նվաճումներ ունեցող որ քաղաքացիներն են պարտադիր զինծառայությունից տարկետում ստանալու: Որոշման նախագիծը հրապարակվել է e-draft.am կայքում:
Այսպիսով՝ քաղաքացուն զինծառայությունից տարկետում տրվում է կառավարության որոշմամբ՝ հանձնաժողովի դրական եզրակացությունների հիման վրա: Հանձնաժողովը ԿԳ նախարարին կից խորհրդակցական մարմին է, իսկ դրա եզրակացությունները՝ խորհրդատվական:
Կառավարությունը գերակա ոլորտներ է ճանաչում, որի շրջանակներում գործունեություն իրականացնող քաղաքացին կարող է տարկետում ստանալ: Այդ ոլորտներում քաղաքացիների ձեռքբերումները հաշվարկվում են բալային միավորներով՝ առավելագույնը 100 բալային միավոր: 80 միավոր հավաքած քաղաքացիները կստանան տարկետում:
Առավել բարձ միավորներ նախատեսվում են արդյունաբերության և բարձր տեխնոլոգիաների ոլորտներում:
Ձեռքբերումների համար հիմք են՝
- տվյալ ոլորտի վերաբերյալ հրապարակումները (մենագրություններ, գրախոսվող գիտական ամսագրերում հոդվածներ),
- գիտաժողովներին մասնակցությունը, գիտակրթական մրցանակները (միջազգային հեղինակավոր մրցույթներ, ՀՀ նախագահի կողմից սահմանված մրցույթներ, դպրոցական կամ այլ բնույթի առարկայական օլիմպիադաներում հաղթանակներ),
- բուհում միջին որակական գնահատականը,
- հանձնաժողովի հետ հարցազրույցը:
Տարկետում տրվում է ուսումնառության ժամկետով: Ուսումը դադարեցնելու դեպքում քաղաքացին կորցնում է տարկետումը և զորակոչվում:
Տարկետման ժամկետի ավարտից հետո գիտության և կրթության բնագավառներում նշանակալի նվաճումների համար քաղաքացին կարող է ևս մեկ անգամ տարկետում ստանալ:
Տարկետման իրավունքից օգտվել ցանկացողները պետք է մինչև յուրաքանչյուր տարվա ապրիլի 1-ը կամ հոկտեմբերի 1-ը դիմում ներկայացնեն հանձնաժողովին:
Հանձնաժողովը նիստեր է անկացնում ամիսը առնվազն մեկ անգամ: Եզրակացություններն ընդունվում են նիստին ներկա հանձնաժողովի անդամների ձայների 2/3-ով:
Նշենք, որ կայքը հնարավորություն է տալիս քաղաքացիներին նախագծի վերաբերյալ ներկայացնել առաջարկություններ և դիտողություններ, տեղեկանալ ներկայացված առաջարկների ընդունման կամ մերժման մասին, մասնակցել նախագծի վերաբերյալ հանրային քննարկումներին: