Հունվարի 12-ին ԱՄՆ նախագահ Դոնալդ Թրամփը 120 օրով երկարաձգել է Միջուկային համաձայնագրի շրջանակներում Իրանի նկատմամբ պատժամիջոցների չեղարկման ժամկետը։ Ըստ Թրամփի՝ սա Միջուկային համաձայնագրի «սարսափելի թերությունները» շտկելու վերջին հնարավորությունն է։ Այս մասին հայտնում է Սպիտակ տան կայքը։
Թրամփը կոչ է արել համաձայնագիրը ստորագրած «եվրոպական երկրներին»* այդ 120 օրվա ընթացքում միասին աշխատել համաձայնագրում փոփոխություններ կատարելու վրա։ Եթե համաձայնագիրը փոփոխության չենթարկվի՝ Թրամփը խոստանում է, որ ԱՄՆ-ն դուրս կգա համաձայնագիրից։
*Նշենք, որ համաձայնագրի անդամ երկրներ են նաև Ռուսաստանը և Չինաստանը: Թրամփը փաստացի «շրջանցել է» այդ երկրներին՝ դիմելով միայն եվրոպական պետություններին՝ Ֆրանսիա, Գերմանիա, Մեծ Բրիտանիա:
Սպիտակ տան ղեկավարը մասնավորապես պահանջում է, որ միջուկային համաձայնագրով Իրանի նկատմամբ սահմանված պարտավորությունները լինեն անժամկետ, ինչպես օրինակ՝ ուրանի հարստացման արգելքը չսահմանափակվի 10 տարով։ (Համաձայնագրով Իրանը կարող է ուրան հարստացնել մինչև 3.67 տոկոս՝ խմբ.)։
Թրամփը նաև պահանջում է չտարանջատել Իրանի միջուկային ծրագիրն ու հեռահար հրթիռների զարգացման ծրագիրը և Իրանի հրթիռային կարողությունը սահմանափակելու ուղղությամբ քայլեր ձեռնարկել։
Ըստ Թրամփի՝ միջազգային տեսուչները պետք է կարողանան Իրանի ցանկացած օբյեկտում ստուգումներ անցկացնել։ Այս պահանջների չկատարման դեպքում ԱՄՆ-ն կվերականգնի իր պատժամիջոցները։
Իրանի արտգործնախարար Մոհամմադ Ջավադ Զարիֆը Թրամփի այս հայտարարությունը անվանել է Միջուկային համաձայանգիրը չեղարկելու հուսահատ փորձ։
Trump's policy & today’s announcement amount to desperate attempts to undermine a solid multilateral agreement, maliciously violating its paras 26, 28 & 29. JCPOA is not renegotiable: rather than repeating tired rhetoric, US must bring itself into full compliance -just like Iran.
— Javad Zarif (@JZarif) January 12, 2018
Համաձայանգրի անդամ մյուս երկրները շարունակում են հանդես գալ Միջուկային համաձայնագիրը պահպանելու կոչով։
Նույն օրը՝ հունվարի 12-ին ԱՄՆ Ֆինանսների նախարարությունը պատժամիջոցներ է սահմանել Իրանի և Չինաստանի 5 ֆիզիկակակ անձի և 9 կազմակերպության նկատմամբ։ Պատժամիջոցների ցանկում է նաև Իրանի դատական իշխանության ղեկավար Սադեղ Ամոլի Լարիջանին։
ԱՄՆ-ում Դոնալդ Թրամփի իշխանության գալուց հետո Իրանի և ԱՄՆ հարաբերությունները ավելի են սրվել։ Թրամփը հաճախ է հանդես գալիս Իրանի միջուկային համաձայնագիրը քննադատող ելույթներով։ Նա Իրանին մեղադրում է ահաբեկիչներին աջակցելու, տարածաշրջանը ապակայունացնելու, հրթիռային ծրագիրը զարգացնելու մեջ։