Հունվարի 9-ին Թուրքիայի նախագահ Ռեջեփ Թայիփ Էրդողանը հայտարարել է, որ իրենք կշարունակեն Եփրատի վահան գործողությամբ սկսած քայլերը Աֆրինում և Մանբիջում: Եփրատի Վահանի արդյունքում Թուրքիան գրավեց Հալեպից հյուսիս՝ Մանբիջի և Աֆրինի միջև ընկած տարածքները: Սա ենթադրում է նոր տարածքների գրավում՝ արդեն անմիջապես քրդական ուժերից: Էրդողանի հայտարարությունը փոխանցում է թուրքական «Հաբերլեր» կայքը:
Խոսելով «ահաբեկչության դեմ պայքարից»՝ Էրդողանը նշում է, որ իրենք Եփրատի Վահան ռազմագործողությամբ կարողացան գրեթե ամբողջությամբ խափանել Սիրիայում «ահաբեկչական միջանցքի» ձևավորումը՝ ավելացնելով՝
«Եփրատի Վահան գործողությամբ մեր արած քայլերը շարունակելով Աֆրինում և Մանբիջում, այնուհետև սահմանի ողջ երկայնքով անվտանգություն և հանգստություն հաստատելով՝ «տա աստված» այդ գործընթացն ավարտին կհասցնենք»:
Նշված Մանբիջում և Աֆրինում ներկայում հիմնականում քրդական «Ժողովրդական ինքնապաշտպանության ջոկատներն» ÇYPG) են: Սակայն մասնավորապես Աֆրինում և հարակից շրջաններում դրանք գործում են արաբական ուժերի հետ համատեղ՝ «Սիրիայի դեմոկրատական ուժեր» (SDF) խմբավորման անվան տակ: Նշված ուժերին օժանդակում է Միացյալ Նահանգները՝ այդ թվում զենքի մատակարարումներով, մարզումներով:
Փաստացի Էրդողանի հայտարարությունը ենթադրում է պատերազմ այդ ուժերի դեմ: Ինչպես արդեն քանիցս նշել ենք, նման հավանականությունն այս պահին կասկածի տակ է, քանի որ դա կարող է նշանակել Անկարայի և Վաշինգտոնի շահերի բախում՝ առնվազն ներկա փուլում:
Այս խնդրին ավելի մանրամասն անդրադարձել ենք հետևյալ հոդվածում.
Հավելենք, որ Էրդողանի հայտարարությանը զուգահեռ թուրքական պետական «Անադոլու» լրատվական գործակալությունը հայտնում է, որ Միացյալ Նահանգները (Պենտագոնը և ԿՀՎ-ն համատեղ) միայն վերջերս Սիրիայի քրդերի 400-հոգանոց անձնակազմի հատուկ նշանակության մարզումներն են ավարտել: Նշվում է, որ այս գործընթացը շարունակական է, իսկ քրդական ուժերի հիմնական պարտականությունը պետք է լինի «սահմանային պաշտպանությունը»:
Հավելենք, որ Սիրիայի քրդերը ԱՄՆ օգնությամբ և միջամտությամբ այժմ փաստացի վերահսկում են Սիրիայի տարածքի զգալի մասը, ըստ տարբեր հաշվարկների՝ մինչև 1/4-ը:
Դեղին՝ Սիրիայի քրդեր, ԱՄՆ, Կանաչ՝ Թուրքիայի ԶՈւ, տարբեր զինյալներ, Կարմիր՝ Սիրիայի բանակ, ռուսներ, Հիզբալլահ