Թուրքիայի զինուժում տեղական ԱԹՍ-ների, հարվածային ուղղաթիռի և զրահամեքենաների քանակը

Թուրքիայի պաշտպանական արդյունաբերության գլխավոր վարչության (ՊԱԳՎ) պետը հայտնել է, որ թուրքական զինուժում այս պահին կա տեղական 43 ԱԹՍ, 26 միավոր T-129 Atak հարվածային ուղղաթիռ, ավելի քան 630 միավոր տեղական 3 տեսակի զրահամեքենա:  Փոխանցում է թուրքական «Էն Սոն Հաբեր» լրատվակայքը:

Ըստ թուրք պաշտոնյայի՝ մինչ օրս Թուրքիայի զինված ուժերին մատակարարվել է՝

• Ավելի քան 100 միավոր «Քիրփի» զրահամեքենա,
• Շուրջ 300 «Կոբրա» զրահամեքենա,
• Շուրջ 230 «Էժդեր Յալչին» զրահամեքենա:

Թուրքիան նաև արտահանում է նշված զրահամեքենաները: Օրինակ «Կոբր»-ներ կան Ադրբեջանի ներքին գործերի նախարարության ներքին զորքերում, «Էժդեր» զրահամեքենաներ Վրաստանում և այլն:

Մասնավորապես նշված երեքը հիմնականում կիրառվում են «Քրդստանի աշխատավորական կուսակցության»` PKK դեմ պայքարում: Ըստ որում թուրքական զինուժի կորուստների մեծ մասը ևս ինքնաշեն պայթուցիկներիով տվյալ զրահամեքենաների պայթեցման հետևանքով են լինում:

Թուրք պաշտոնյան նաև նշել է, որ Թուրքիայի զինուժին արդեն հանձնել են 27-րդ T-129 Atak հարվածային ուղղաթիռը: Այն Թուրքիայում հավաքվում է իտալական ուղղաթիռի լուծումներով: Ներկայում նման ուղղաթիռներ կան միայն Թուրքիայի ԶՈւ ցամաքային զորքերում, սակայն ապագայում կարող են հայտնվել նաև ժանդարմերիայի և ոստիկանության սպառազինությունում:

Այս պահին թուրքական զինուժի սպառազինությունում կա 43 միավոր տեղական անօդաչու թռչող սարք: Ըստ ՊԱԳՎ պետի՝ դրանցից ընդամենը շուրջ 10-ն են հարվածային:

Նոյեմբերին Թուրքիայի պաշտպանության նախարարը հայտնել էր, որ թուրքական զինուժի սպառազինությունում կա 5 միավոր «Անքա» ԱԹՍ, որից 2-ը հարվածային, ինչպես նաև 38 միավոր «Բայրաքթար» ԱԹՍ, որից 15-ը հարվածային:

Բացի այդ, նշված անօդաչուներից կան նաև Թուրքիայի ոստիկանության և ժանդարմերիայի սպառազինությունում. ընդհանուր առմամբ՝ 19 միավոր: Սրան զուգահեռ, թուրքական զինուժն ու այս կառույցներն իրենց տրամադրության տակ ունեն նույնպես թուրքական արտադրության փոքր ԱԹՍ-ներ, որոնք հաշվարկում ներառված չեն:

Թուրքական արտադրության «Անքա» և «Բայրաքթար» հարվածային ԱԹՍ-ներ