Թուրքիան Կատարին 500-ից ավել զրահամեքենա է մատակարարելու

Թուրքիան Կատարին է մատակարարելու թուրքական Nurol Makina  ընկերության արտադրության 400 միավոր Ejder Yalçın զրահամեքենա ևս 100-ից ավել NMS զրահամեքենա: Այս մասին հայտնում է թուրքական պետական «Անադոլու» գործակալությունը:

Թուրքական Nurol Makina ընկերության արտադրության Ejder Yalçın զրահամեքենան

Թուրքական Nurol Makina ընկերության արտադրության Ejder Yalçın զրահամեքենան

NMS զրահամեքենան թուրքական ընկերությունը առաջին անգամ ներկայացրել է 2017-ի մայիսին Ստամբուլում անցկացված IDEF-2017 ցուցահանդեսի ժամանակ: Սա այդ զրահամեքենայի առաջին արտասահմանյան մատակարարումը կդառնա:

Թուրքիան Ejder Yalçın զրահամեքենան մինչև այժմ վաճառել է Թունիսին և Ուզբեկստանին: Ընդ որում, Ուզբեկստանի հետ կնքված պայմանագրի համաձայն՝ այդ երկրում հավաքվելու է 1000 միավոր նման զրահամեքենա:

Միևնույն ժամանակ թուրքական «Ասելսան» ռազմարդյունաբերական ընկերությունը Կատարին մատակարարելու է hեռակառավարվող կայունացված (ստաբիլիզացված) մարտական մոդուլներ (SARP):

Թուրքական ընկերությունը MRAP դասի ուժեղացված հակաականային պաշտպանությամբ Ejder Yalcın զրահամեքենան առաջին անգամ ներկայացրել է 2012-ին:

4×4 ընթացամասով Ejder Yalcın զրահամեքենայի բնութագիր.

  • Անձանակազմը՝ մինչև 11 զինծառայող,
  • Առավելագույն արագությունը՝ 120 կմ/ժ,
  • Զանգվածը՝ 14 տոննա,
  • Շարժիչը՝ 375 ձիաուժ:
Թուրքական Nurol Makina ընկերության արտադրության NMS զրահամեքենա

Թուրքական Nurol Makina ընկերության արտադրության NMS զրահամեքենա

4×4 ընթացամասով NMS զրահամեքենայի մարտավարատեխնիկական բնութագիր.

  • Անձանակազմը՝ մինչև 9 զինծառայող,
  • Առավելագույն արագությունը՝ 140 կմ/ժ,
  • Զանգվածը՝ 10 տոննա,
  • Շարժիչը՝ 300 ձիաուժ,
  • Կարող է սպառազինվել 7,62 մմ կամ 12,7 մմ գնդացիրներով և 40 մմ հակաօդային պաշտպանության համակարգով։

Թուրքիան ռազմական և ռազմակրթական ոլորտում մի շարք պայմանագրեր է կնքել Կատարի հետ: Համատեղ ռազմական ուսումնավարժանքների և Կատարում Թուրքիայի ռազմական ուժերի տեղակայման մասին համագործակցության համաձայնագրերը կնքվել է դեռևս 2014-ին:

2016-ին էլ կնքվել է Կատարում Թուրքիայի զինված ուժեր տեղակայելու մասին երկու երկրների կառավարությունների «իրականացման համաձայնագիրը» (implementation agreement): Այդ համաձայնագիրը Թուրքիայի խորհրդարանը վավերացրել է 2017-ի հունիսին, որից հետո էլ սկսել է ուժեր տեղակայել Կատարում:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *