Դեկտեմբերի 12-ին ՀՀ ՊՆ-ում ամփոփվել են պաշտպանության, առողջապահության, տարածքային կառավարման նախարարների հրամանով ստեղծված՝ Գեղարքունիքի, Տավուշի, Սյունիքի մարզերում բժշկական կազմակերպությունների, ՀՀ ՊՆ Զանգեզուրի կայազորային հոսպիտալի ու Բերդի առանձին բժշկական ջոկատի վերակազմակերպման գործընթացը: Այս մասին հայտնում է ՀՀ ՊՆ կայքը:
Կողմերը քննարկել են վերակազմակերպման գործընթացն ապահովելու նպատակով ստեղծված համատեղ աշխատանքային խմբի գործունեության արդյունքները։ Խումբը ստեղծվել է նախարարների համատեղ հրամանով:
Խորհրդակցությանը մասնակցել են ՀՀ պաշտպանության նախարար Վիգեն Սարգսյանը, առողջապահության նախարար Լևոն Ալթունյանը, տարածքային կառավարման և զարգացման նախարարի տեղակալ Վաչե Տերտերյանը, շահագրգիռ գերատեսչությունների և մարզպետարանների ներկայացուցիչներ։
Հանդիպման ընթացքում ներկայացվել են բժշկական հաստատությունների վերակազմակերպման արդյունքում ձևավորվող կազմակերպությունների հնարավոր կառուցվածքների վերաբերյալ առաջարկներ, քննարկվել են բժշկական օգնության և սպասարկման որակի, ծավալների, մատչելիության, կադրային ռեսուրսների բաշխվածության, տեխնիկական հագեցվածության, ամբողջական գործընթացի արդյունավետության վերաբերյալ մի շարք հարցեր։