Դեկտեմբերի 4-ին թուրք-իրանական սահմանին զինյալների հարձակման հետևանքով վիրավորվել է Իրանի սահմանապահ ծառայության 2 զինծառայող, և ևս 2 քաղաքացիական անձ։ Վիրավորները Թուրքիայի ԶՈւ ուղղաթիռով տեղափոխվել են այդ երկրի հիվանդանոցներ։ Վիրավոր սահմանապահներից մեկը մահացել է հիվանդանոցում։ Այս մասին տեղեկացնում է իրանական «ԻՌԻԲ» լրատվական գործակալությունը։
Միջադեպի առնչությամբ հեռախոսազրույց են ունեցել Թուրքիայի և Իրանի արտգործնախարարները։ Թուրքիայի արտգործնախարար Մևլյութ Չավուշօղլուն հայտնել է, որ հարձակումն իրականացրել են PKK-ի («Քրդստանի աշխատավորական կուսակցության») զինյալները։
Իրանի արտգործնախարարի խոսնակ Բահրամ Ղասեմիի խոսքերով՝ Իրանը ուսումնասիրում է միջադեպի հստակ պատճառները։ Հայտնում է Իրանի ԱԳՆ կայքը։
Ավելի վաղ՝ նոյեմբերի 3-ին, թուրք-իրանական սահմանին զինյալների հետ բախումների հետևանքով սպանվել էր Իրանի սահմանապահ ծառայության 8 զինծառայող:
Զինյալները եղել էին PJAK-ի անդամներ (քրդ. Partiya Jiyana Azad a Kurdistanê, «Քուրդիստանի ազատ կյանքի կուսակցություն»):
PJAK-ը 2003-ին Իրանում ստեղծված քրդական կազմակերպություն է, որը ղեկավարվում է PKK-ի կողմից: Գործում է հիմնականում Իրանի Քուրդիստան, Արևմտյան Ադրբեջան (Ատրպատական) և Քերմանշահ նահանգներում:
Հիշեցնենք, որ նոյեմբերի 28-ի լույս գիշերը Թուրքիայի ԶՈւ ռազմաօդային ուժերի շուրջ 30 ռազմական ինքնաթիռ ռմբակոծել էին Իրաքի Ասոս լեռան լրջանում PKK դիրքերը: Ըստ թուրքական իշխանամետ «Յենի Շաֆաք» պարբերականի՝ Թուրքիան առաջին անգամ գործել է Իրաքից և Իրանից ստացած հետախուզական տվյալներով:
Թուրքական պարբերականի նյութում նշվում է, որ երեք երկրները՝ Թուրքիան, Իրաքը և Իրանը միավորել են ջանքերը PKK-ի դեմ պայքարում:
Հավելենք, որ Թուրքիան PKK դեմ պայքարի շրջանակներում Իրանի հետ սահմանի երկայնքով պատ է կառուցում: