«Իսլամական պետություն» ահաբեկչական խմբավորման դեմ պայքարի ԱՄՆ գլխավորած միջազգային կոալիցիայի նոյեմբերի 30-ին հրապարակած զեկույցի համաձայն՝ 2014 թվականի օգոստոսից մինչև 2017 թվականի հոկտեմբեր ամիսը կոալիցիայի ավիահարվածներից Սիրիայում և Իրաքում մահացել է 801 քաղաքացիական անձ: Զեկույցը տեղադրվել է ԱՄՆ գլխավորած կոալիցիայի պաշտոնական կայքում:
ԱՄՆ գլխավորած միջազգային կոալիցիայի ավիահարվածները ԻՊ դիրքերին Սիրիայի Քոբանի քաղաքում (արխիվ)
Ըստ աղբյուրի՝ ևս 695 մահվան դեպք դեռևս հետաքննվում և պարզ չէ, թե արդյոք քաղաքացիականները մահացել են ավիահարվածներից:
Ըստ զեկույցի՝ 2014-ի օգոստոսից մինչև 2017-ի հոկտեմբերը ներառյալ ԱՄՆ գլխավորած կոալիցիան իրականացրել է 28000-ից ավել ավիահարված:
Միևնույն ժամանակ Սիրայում և Իրաքում ԱՄՆ գլխավորած միջազգային կոալիցիայի և Ռուսաստանի ավիահարվածների մոնիթորինգով զբաղվող Airwars.org կայքը հայտնում է, որ 2017-ի հոկտեմբերի 31-ի դրությամբ Սիրիայում և Իրաքում կոալիցիայի ավիահարվածներից ամենաքիչը 5961 քաղաքացիական է սպանվել: Միևնույն ժամանակ աղբյուրը չի բացառում, որ կորուստների թիվը կարող է տատանվել 6000-9000 միջև:
Ավելի վաղ այս աղբյուրը հայտնել էր, որ 2017-ի հուլիսի 30-ի դրությամբ ԱՄՆ գլխավորած միջազգային կոալիցիայի ավիահարվածներից սպանվել է ամենաքիչը 4354 քաղաքացիական անձ:
ԱՄՆ գլխավորած միջազգային կոալիցիան կազմավորվել է 2014-ի սեպտեմբերին, այն բանից հետո, երբ «Իսլամական պետություն» ահաբեկչական խմբավորումը կարողացավ 2014-ի հունիսի կեսերին Իրաքի կառավարական բանակից գրավել մեծությամբ երկրորդ քաղաք Մոսուլը:
Սիրիայում կոալիցիայի ավիահարվածների ինֆոգրաֆիկա, աղբյուրը՝ Airwars.org կայք
Իրաքում կոալիցիայի ավիահարվածների ինֆոգրաֆիկա, աղբյուրը՝ Airwars.org կայք