Սիրիայի Ռաքքա քաղաքի ազատագրման համար «Իսլամական պետություն» ահաբեկչական խմբավորման դեմ գործողություններին աջակցելու նպատակով ուղարկված ԱՄՆ Ծովային հետևակի շուրջ 400 զինծառայող դուրս են բերվելու Սիրիայից: Այս մասին հայտնել են ԻՊ դեմ ԱՄՆ գլխավորած կոալիցիայից, փոխանցում է New York Times պարբերականի կայքը:
Ամերիկյան զրահամեքենաները Մանբիջից հյուսիս ընկած Յալանլը գյուղի մոտ: 3/5/2017. լուսանկարը՝ AFP-ի
Ծովային հետևակի զինծառայողների հետ միասին Սիրիայից դուրս են բերվում նաև հրետանային համակարգերը:
«Մենք դուրս ենք բերում զինված ուժերը, սակայն շարունակելու ենք աջակցել Սիրիայի և Իրաքի մեր գործընկերներին անվտանգության պահպանման համար:… Մեր մնացող զինված ուժերը շարունակելու են աշխատել գործընկեր ուժերի հետ ԻՊ մնացորդների դեմ պայքարելու, ԻՊ-ի «վերակենդանացումը» կանխելու համար», – հայտարարել է կոալիցիայի բրիգադային գեներալ Ջոնաթան Բրագան:
Հիշեցնենք, որ այս տարվա մարտին Միացյալ Նահանգները Սիրիա է ուղարկել Ծովային հետևակի 400 զինծառայողի: Ամերիկյան ծովային հետևակի զինծառայողները տեղակայվել էին Սիրիայի հյուսիս-արևելքում՝ Հասաքա նահանգի՝ քրդական ուժերի վերահսկողության տակ գտնվող հատվածում։
Նշենք, որ օրեր առաջ Պենտագոնը հրապարակել է երկրի զինուժի, այդ թվում նաև՝ այլ երկրներում գտնվող ստորաբաժանումների թվաքանակը՝ 2017 թ. սեպտեմբերի 30-ի դրությամբ: Ըստ այդ զեկույցի՝ Սիրիայում գործում է 1720 զինծառայող, այդ թվում 1547-ը՝ ակտիվ զորակազմն է: Մինչ այդ ամերիկյան կողմը հայտարարում էր Սիրիայում ընդամենը 500-ի զինծառայողի մասին:
ԱՄՆ-ն միևնույն ժամանակ ռազմական աջակցություն է ցուցաբերում արաբա-քրդական «Սիրիայի դեմոկրատական ուժեր» (SDF) խմբավորմանը, որը հենց իրականացրել է Ռաքքայի ազատագրման գործողությունը: Այդ խմբավորման հետ ԱՄՆ-ի համագործակցությանը բացասաբար է վերաբերում Թուրքիան, որը Սիրիայի քրդական ուժերին համարում է «Քրդստանի աշխատավորական կուսակցության» (PKK) սիրիական ճյուղ և «ահաբեկչական կառույցներ»: