Նոյեմբերի 30-ին Ադրբեջանի պաշտպանության նախարարն ընդունել է Թուրքիայի զինված ուժերի ռազմաօդային ուժերի հրամանատարին: Կողմերը քննարկել են ռազմական համագործակցությունը, այդ թվում՝ ցամաքային և ռազմաօդային ուժերի միջև համատեղ զորավարժությունների թիվն ավելացնելու խնդիրը: Այս մասին հայտնում է Ադրբեջանի ՊՆ կայքը:
Բաքվում հանդիպել են Ադրբեջանի պաշտպանության նախարարը և Թուրքիայի ՌՕՈւ հրամանատարը. 30.11.2017
Կողմերն անդրադարձել են նաև ռազմական մասնագետներից կազմված փորձագետների խմբերի փոխադարձ այցելություններն ավելացնելու հարցը, ռազմական, ռազմատեխնիկական, ռամակրթական ոլորտներում համագործակցությունը զարգացնելու հեռանկարները:
Թուրքիայի ՌՕՈւ հրամանատար, բանակի գեներալ Հասան Քյուչուքյավուզը Ադրբեջան այցելել է նոյեմբերի 29-ին և այնտեղ կմնա մինչև դեկտեմբերի 1-ը:
Հիշեցնենք, որ Թուրքիան և Ադրբեջանը ներկայում անցկացնում են ցամաքային և ռազմաօդային ուժերի միջև մի շարք համատեղ ամենամյա զորավարժություներ, այդ թվում՝
- «ԹուրԱԶ բազե» (TurAz Şahini) ավիացիայի զորավարժություն,
- «Անատոլիայի արծիվ-2016» (Anadolu Kartalı-2016) ՌՕՈւ բազմակողմ վարժանքներ (Ադրբեջանը ներգրավվում է կամ որպես դիտորդ, կամ ուղարկում օդաչուներ),
- Ցամաքային զորքերի համատեղ վարժանքներ Բաքվում և Նախիջևանում,
- Ցամաքային զորքերի համատեղ վարժանքներ Կարսում,
- «Կովկասյան արծիվ» (Kafkas Kartalı) հատուկ նշանակության ուժերի թուրք-վրաց-ադրբեջանական զորավարժություն:
Բացի նշվածները կողմերը այլ համատեղ վարժանքներ ևս անցկացնում են: