Մինչև տարեվերջ Մարտակերտի շրջանի Թալիշ գյուղում ամբողջությամբ շահագործման կհանձնվեն առաջին 17 բնակելի տները, որտեղ մշտական բնակություն են հաստատելու այն բնակիչները, ովքեր առաջինն են ցանկություն հայտնել վերադառնալ գյուղ: Այս մասին «Արցախպրեսի» հետ զրույցում հայտնել է Արցախի քաղաքաշինության նախարար Կարեն Շահրամանյանը:
Նախարարը նաև հայտնել էր, որ շինաշխատանքների հաջորդ փուլով կառուցվելու է ևս 10 տուն, որից 2-ի աշխատանքներն արդեն ընթացքի մեջ են: Իսկ կառուցվող դպրոցի և մանկապարտեզի շենքերը շահագործման են հանձնվելու մինչև 2018 թվականի սեպտեմբերի 1-ը:
Կարեն Շահրամանյանի խոսքով՝ Թալիշում կառուցվող հասարակական նշանակության բոլոր շենքներն ապահովված են ապաստարաններով, որոնք կարող են ծառայել նաև հարևանությամբ գտնվող տների բնակիչները:
Նշենք, որ ավելի վաղ Թալիշի գյուղապետը հայտնել էր, որ Թալիշում նոր կառուցվող բոլոր անհատական տները և ընդհանուր օգտագործման բոլոր կառույցները ունենալու են իրենց ապաստարանները նկուղային հարկում։
Նոյեմբերի 14-ին Արցախի ղեկավար Բակո Սահակյանն այցելել էր Թալիշ և ծանոթացել այնտեղ իրականացվող շինարարական աշխատանքներին:
2017-ի հունիսին Թալիշի գյուղապետը հայտնել էր, որ մինչ Ապրիլյան պատերազմը Թալիշում մշտական ապրել է 150 ընտանիք՝ 500 բնակիչ, ևս 67 ժամանակավոր բնակիչ, այդ թվում՝ ուսուցիչներ, զինծառայողներ, անասնապահներ։ 37 ընտանիք՝ 140 բնակիչ ապրում է Ալաշան համայնքում։
Թալիշ գյուղի և Ալաշանում բնակվող թալիշեցիների մասին ավելի մանրամասն կարող եք ծանոթանալ այստեղ: