Սիրիացի սակրավորները մաքրել են վերջերս ԻՊ-ից ազատագրված Աբու Քամալ քաղաքի կենտրոնական հրապարակը, այժմ ականազերծում են հիմնական փողոցները: Այս մասին հայտարարել է Սիրիայում հակամարտող ուժերի հաշտեցման կենտրոնի ղեկավար, գեներալ-լեյտենանտ Սերգեյ Կուրալենկոն:
Ռուսաստանյան «ՌԻԱ Նովոստի» գործակալության փոխանցմամբ՝ պաշտոնյան հայտարարել է, որ Դեր Զորում շարունակվում է ահաբեկչական խմբավորումներից ազատագրված տարածքների ականազերծման աշխատանքները:
Դեր Զորն ականազերծել են ՌԴ ԶՈւ սակրավորները, աշխատանքներին մասնակցել են նաև սիրիացի սակրավորներ:
Վերջին մի քանի ամիսներին Իսլամական պետությունը կորցրել է իր տարածքների մեծ մասը Սիրիայում և Իրաքում: Նշենք, որ ավելի վաղ Սիրիայի կառավարական բանակը ամբողջությամբ վերահսկողություն էր հաստատել Աբու Քամալ քաղաքում, որը համարվում էր ԻՊ վերջին խոշոր հենակետը Սիրիայում: Աշխատանքներ են արվում քաղաքը պայթուցիկն նյութերից և ականներից մաքրելու համար:
Քաղաքի ազատագրման գործողությանը ավիահարվածներով աջակցել է Ռուսաստանը: Բացի այդ հոկտոմբերի վերջին ՌԴ ՌԾՈւ «Վելիկի Նովգորոդ» սուզանավից «Կալիբր» թևավոր հրթիռներ էին արձակվել քաղաքում ԻՊ դիրքերին:
Սիրիայում ակտիվորեն ականազերծման աշխատանքներ են տանում ՌԴ ԶՈւ սակրավորները:
Ի դեպ, նոյեմբերի 6-ին ՌԴ պաշտպանության փոխնախարար Ալեքսանդր Ֆոմինը հայտարարել էր, որ Հայաստանը և Սերբիան հաստատել են Սիրիայում ականազերծման աշխատանքներին ներգրավվելու պատրաստակամությունը: