Սիրիայի Աբու Քամալ քաղաքում «Իսլամական պետություն» ահաբեկչական խմբավորման դեմ մղած մարտերում զոհվել է իրանցի զինծառայող Համիդ Զիայեին։ Այս մասին նոյեբերի 21-ին տեղեկացնում է իրանական «Թասնիմ» լրատվական գործակալությունը։
Ըստ գործակալության՝ Զիայեին Սիրիա մեկնել էր կամավոր։
Աբու Քամալում զոհված իրանցի զինծառայող Համիդ Զիայեին
Նշենք, որ ավելի վաղ հայտնի էր դարձել Աբու Քամալում 5 իրանցի զինծառայողի մահվան մասին (1,2)։ Զոհվածների թվում կային նաև գեներալ և գնդապետ։
Հավելենք, որ նոյեմբերի 19-ին Սիրիայի բանակը ամբողջովին ազատագրել է երկրում ԻՊ վերջին խոշոր հենակետ Աբու Քամալ քաղաքը:
Մինչ օրս Սիրիայում Իրանի ունեցած կորուստները ավելի շատ են, քան Թուրքիայի և Ռուսաստանի կորուստները միասին վերցրած։ Մարտին Իրանի շահիդների և վետերանների միության ղեկավար Մուհամեդ Ալի Շահիդի Մահալաթին հայտարարել էր, որ Սիրիայում և Իրաքում մինչև այժմ սպանվել է Իրանի կողմից ուղարկված 2100 մարտիկ։
Չնայած այս կորուստներին՝ Իրանը պնդում է, որ Սիրիայում չունի մարտական ստորաբաժանումներ և այնտեղ է ուղարկում միայն ռազմական խորհրդատուներ, իսկ զոհվող մարտիկները՝ կամավորներ են։
Սիրիայում Իրանի գործողությունները համակարգում է ԻՀՊԿ «Ղոդս» ստորաբաժանումը՝ Ղասեմ Սոլեյմանիի հրամանատարությամբ։