Թուրքիայի ներքին գործերի նախարարության ժանդարմերիայի զորքերում կա շուրջ 179 հազար ծառայող: Քրդական PKK-ի դեմ պայքարի համար նախատեսված մեկ այլ կառույցում՝ «գյուղական պահպանների» վաշտերում, կա շուրջ 50 հազար «անվտանգության պահապան»: Այս տեղեկություննեերը նոյեմբերի 15-ին Թուրքիայի խորհրդարանում ներկայացրել է այդ երկրի ՆԳ նախարար Սուլեյման Սոյլուն:
Մարտի 2-ին Հայաստանին սահմանակից Աղրը նահանգի ժանդարմերիայի հատուկ նշանակության գումարտակի վարժանքներ
Ըստ Սոյլուի՝ թուրքական ոստիկանության անձնակազմը ներկայում կազմում է շուրջ 268 հազար, իսկ առափնյա անվտանգության հրամանատարությանը՝ շուրջ 5500:
Ժանդարմերիայում ծառայող 179 հազարի 60 տոկոսը պրոֆեսիոնալ զինծառայողներ, անձնակազմ են: 2018 թ. այդ ցուցանիշը նախատեվում է հասցնել 65 տոկոսի:
Նշենք, որ ժանդարմերիան ըստ էության Թուրքիայի ներքին զորքերն են, որոնց հիմնական գործառույթը «Քրդստանի աշխատավորական կուսակցության» (PKK) դեմ գործողություններն են: Բացի այդ, ժանդարմերը հսկում են Թուրքիայի ցամաքային սահմանների մի մասը՝ Թուրքիայի ԶՈւ ցամաքային զորքերի հետ համատեղ:
Թուրքաական ժանդարմերիայի հատուկ նշանակության ստորաբաժանման զինծառայողներ
Հիշեցնենք, որ մինչև 2016 թ. հուլիսի ռազմական հեղաշրջման փորձը ժանդարմերիան ենթարկվում էր Թուրքիայի ԶՈւ գլխավոր շտաբին: Հետհուլիսյան փոփոխությունների արդյունքում այն ամբողջությամբ անցավ ՆԳՆ վերահսկողությանը:
Մինչև 2016 թ. հուլիս ամիսը ներառյալ Թուրքիայի ԶՈւ ԳՇ-ն ներկայացնում էր բանակի, ժանդարմերիայի և առափնյա անվտանգության հրամանատարության անձնակազմերի թվաքանակը: Ըստ այդ տվյալների՝ նախորդ տարվա հունիսի դրությամբ ժանդարմերիայի անձնակազմը կազմում էր շուրջ 155 հազար զինծառայող և քաղաքացիական աշխատող: Այդ թվում պրոֆեսիոնալ զինծառայողների հարաբերակցությունը հասնում էր 53 տոկոսի:
Հեղաշրջման փորձից հետո ինչպես բանակից, այնպես էլ՝ ժանդարմերիայից բազմաթիվ զինծառայողներ, այդ թվում՝ բարձրաստիճան, հեռացվել էին: Եթե համեմատենք բոլոր տվյալները՝ ապա մեկ տարվա ընթացքում Թուրքիայում ոչ միայն վերականգնել են ժանդարմերիայի թվաքանակը, այլև՝ շուրջ 25 հազարով գերազանցել նախահուլիսյան ցուցանիշը:
Թուրքիայի «Գյուղական պահապանների» հիմնական գործառույթը ևս PKK-ի դեմ պայքարն է: Այն ստեղծվել է դեռևս 1985 թվականից և համալրվում է քրդաբնակ գյուղերի բնակիչներից: Նրանք պետության կողմից ստանում են զենք, աշխատավարձ և պարտավոր են տեղում ներգրավվել PKK-ի դեմ գործողություններին:
PKK-ի դեմ գործող «գյուղական պահապաններ», որոնք գործում են թուրքական ժանդարմերիայի ենթակայության ներքո
Հավելենք, որ, համաձայն թուրք նախարարի հայտարարության, «գյուղական պահապաններին» այժմ մարզում են նրանցից պրոֆեսիոնալ զինծառայողներ, իսկ այնուհետև՝ նաև կրտսեր սպաներ պատրաստելու համար:
Այսպիսով՝ Թուրքիան պահում է ավելի քան 200 հազարանոց զինված ուժեր՝ միայն քրդական կառույցի դեմ պայքարի համար: Բացի այդ, գործողություններին ներգրավվում են նաև ոստիկանության հատուկ նշանակության ուժերը, ԶՈւ ստորաբաժանումներ: