Իրանը ցուցադրել է մինչ այս բալիստիկ հրթիռների տեղափոխման և արձակման կայանների (ՏԱԿ) ամենամեծ քանակությունը, փոխանցում է JanesDefenceWeekly-ը։
Մայիսի 26-ին իրանական հեռուսատեսությամբ ցուցադրվել են 2 շարքով կանգնեցված 26 ՏԱԿ-եր։
Վերջիններիս այսպիսի քանակությունը Իրանին հնարավորություն է տալիս ավելի շատ բալիստիկ հրթիռներ բաց թողնել միևնույն ուղղությամբ, ինչը մեծացնում է Իրանի հնարավորությունները շրջանցելու հրթիռային պաշտպանական համակարգերը, ինչպիսին է իսրայելական Arrow համակարգը, որն ունի սահմանափակ թվով կործանիչներ։ Սա Իրանին ռազմավարական առավելություն է տալիս։
Իրանի պատրաստված ՏԱԿ-երը, սակայն, ինքնագնաց չեն և քարշակվում են բեռնատարերի կողմից, որոնք ավելի էժան են և ավելի հեշտ են կառուցվում։ Ռազմավարական և միջազգային ուսումնասիրությունների կենտրոնի (CSIS) մայիսի 23-ի զեկույցի համաձայն՝ Իրանը ունի 6-20 ՏԱԿ-եր իր «Շաhաբ» (Shahab) 3 միջին հեռահարության բալիստիկ հրթիռները արձակելու համար, որոնք կարող են հասնել Իսրայելին։
Մայիսի 26-ին արված նկարներից երևում է, որ Իրանը ունի 2 տեսակի ՏԱԿ փոխադրիչներ, որոնք բավական մեծ են «Շահաբ 3Ս» հրթիռները փոխադրելու համար։ Մյուս կողմից, վիճելի հարց է ցուցադրված նմուշներից քանիսն են փոխադրվել կամ արդյոք Իրանը ցուցադրել է ՏԱԿ-երի իր ողջ քանակությունը։
Յուրաքանչյուր շարքի առաջին 4 ՏԱԿ-երը նման են 2010թ. ցուցադրված ՏԱԿ-երին, որոնք նախատեսված էին «Սեջջիլ» (Sejjil) կարծր վառելիքով աշխատող հրթիռների փոխադրման համար։ «Սեջջիլ» հրթիռները ավելի ծանր են, սական ավելի արագ կարող են բաց թողնվել՝ մեծացնելով թիրախին հասնելու հավանականությունը։