Նոյեմբերի 15-ին Ռուսաստանի ԶՈւ Տու-22Մ3 հեռահար ռմբակոծիչները հարվածել են «Իսլամական պետություն» ահաբեկչական խմբավորման դիրքերին Սիրիայի Դեր Զոր նահանգում: Այս մասին հայտնում են ՌԴ ՊՆ-ից:
ՌԴ ԶՈւ 6 միավոր Տու-22Մ3 ռմբակոծիչները օդ են բարձրացել Ռուսաստանի տարածքից, անցնելով Իրանի և Իրաքի վրայով, հարվածել են ԻՊ դիրքերին Աբու Քեմալ քաղաքի մոտակայքում: Ռմբակոծիչներին ուղեկցել են Սիրիայի Հմեյմիմ ավիաբազայում տեղակայված Սու-30ՍՄ կործանիչները:
Дальние бомбардировщики Ту-22М3 нанесли авиаудар по объектам террористов в #СИРИЯ https://t.co/ihD8vzVnfi pic.twitter.com/OhDqk9oUtP
— Минобороны России (@mod_russia) November 15, 2017
Ըստ հաղորդագրության՝ նախանշված բոլոր թիրախները «ոչնչացվել են»: Հարվածներից հետո ինքնաթիռները վերադարձել են իրենց տեղակայման վայր:
Տու-22Մ3 ռմբակոծիչները հարվածել են ԻՊ դիքրերին նաև նոյեմբերի 1-ին: Բացի օդուժի հարվածներից, հոկտեմբերի 31-ին Միջերկրական ծովից ՌԴ ԶՈւ Սևծովյան նավատորմի «Վելիկի Նովգորոդ» սուզանավից «Կալիբր» թևավոր հրթիռներ են արձակվել նույն Աբու Քեմալում ԻՊ դիրքերին:
Նշենք՝ նոյեմբերի 8-ին տեղեկություններ տարածվեցին այն մասին, որ Սիրիայի կառավարական բանակը ամբողջությամբ վերահսկողություն է հաստատել Աբու Քեմալ քաղաքում, որը համարվում է «Իսլամական պետության» վերջին հենակետը Սիրիայում: