ՀՀ ԱԺ Պաշտպանության և անվտանգության հարցերի մշտական հանձնաժողովի նիստի ընթացքում դրական եզրակացություն տալու համար քվեարկության է դրվել և ընդունվել խորհրդարանում առաջին ընթերցմամբ ընդունված «Պաշտպանության մասին» օրենքի նախագիծը։
Ավելի վաղ՝ հոկտեմբերի 25-ին, Ազգային ժողովում առաջին ընթերցմամբ ընդունվել էր «Պաշտպանության մասին» օրենքի նախագիծը: Նախագիծը դեռևս պետք է քննարկվի և ապա երկրորդ ընթերցմամբ ընդունվի ԱԺ կողմից։
«Պաշտպանության մասին» օրենքի նախագիծը հիմնականում ուղղված է ՀՀ զինված ուժերի օրենսդրական դրույթները փոփոխված սահմանադրությանը համապատասխանեցնելուն: Օրինագծով սահմանվում են մի շարք կարևոր դրույթներ, այդ թվում՝ ՀՀ զինված ուժերի գլխավոր շտաբի պետի, պաշտպանության նախարարի լիրազորություններին վերաբերող:
Մասնավորապես սահմանվում է, որ ՀՀ ԶՈւ ԳՇ պետը կարող է նշանակվել 5 տարի ժամկետով, առավելագույնը 2 անգամ անընդմեջ: Խաղաղ ժամանակ ԶՈւ ԳՇ պետը ենթարկվում է պաշտպանության նախարարին, իսկ պատերազմական իրադրության ժամանակ՝ ՀՀ վարչապետին: Նոր սահմանադրության և այս օրինագծի համաձայն՝ հենց ՀՀ վարչապետն է ստանձնում զինված ուժերի գերագույն գլխավոր հրամանատարի պաշտոնը, ի տարբերություն գործող օրենսդրական դրույթների, համաձայն որոնց, գերագույն գլխավոր հրամանատարը նախագահն է:
Օրենսդրական նախաձեռնությամբ կարգավորվում են զինված ուժերի, պաշտպանության նախարարության գործունեությանը, գործառույթներին վերաբերող մի շարք այլ դրույթներ ևս: