Նոյեմբերի 7-ին Թուրքիայի 12 նահանգներում անվտանգության գլխավոր տնօրինության (ոստիկանության) ստորաբաժանումները ձերբակալել են 20 գործող ենթասպա: Զինծառայողները մեղադրվում են «գյուլենականների հետ կապ ունենալու» համար: Ձերբակալման որոշում է կայացվել ևս 33 ենթասպայի նկատմամաբ: Այս մասին հայտնում է թուրքական պետական «Անադոլու» գործակալությունը:
Թուրքիայում գործող զինվորականների են ձերբակալել՝ «գյուլենականության» մեղադրանքով. (արխիվ)
Ենթասպաները ծառայում են Թուրքիայի ՌՕՈւ մարտավարական օդուժի հրամանատարության և հակահրթիռային պաշտպանության ուժերին կից 5-րդ ավիաբազայում, որը տեղակայված է երկրի հյուսիսային Ամսասիա նահանգի Մերզիֆոն գավառում:
Բացի այդ, Մերզիֆոնի դատախազության՝ զինված ուժերում «գյուլենականների դեմ» հետաքննության արդյունքում ևս 33 գործող զինծառայողի ձերբակալելու որոշում է ընդունվել: Զինծառայողներին բերման ենթարկելու համար ոստիկանական ուժերը հատուկ գործողություններ են իրականացնում:
Հիշեցնենք, որ հոկտեմբերի 31-ին Քոջաելի նահանգում ձերբակալվել են է 24 գործող զինվորականի: Վերջին երկու ամիսներին Թուրքիայում ձերբակալվել է մոտ 240-245 զինծառայող, որից մի մասը գործող (1, 2, 3, 4, 5, 6, 7):
Թուրքիայում 2016-ի հուլիսի ռազմական հեղաշրջման համար իշխանությունները մեղադրում են ԱՄՆ-ում ապրող ազգությամբ թուրք, իսլամական քարոզիչ Ֆեթհուլլա Գյուլենին: Թուրքիայի իշխանությունները պնդում են, որ նա իր «լրտեսներին» ներդրել էր Թուրքիայի զինված ուժեր, այլ ուժային կառույցներ՝ փորձելով նրանց միջոցով հեղաշրջում անել:
Հեղաշրջման փորձից զինված ուժերից հեռացվել են և ձերբակալվել են մի շարք զինծառայողներ, այդ թվում նաև բարձրագույն սպայական կազմի մի մասը՝ գեներալներ, գնդապետներ: Բացի զինվորականներից, ճնշումների և հետապնդումների են ենթարկվում ամենատարբեր կառույցների, պետական հաստատությունների աշխատակիցներ, լրագրողներ, իրավապաշտպաններ: