Թուրքիային ռուսաստանյան Ս-400 «Տրիումֆ» զենիթահրթիռային համակարգեր վաճառելու մասին Ռուսաստանի և Թուրքիայի կնքած պայմանագրի գումարը գերազանցում է 2 մլրդ դոլարը:Այս մասին նոյեմբերի 2-ին ռուսաստանյան «ՏԱՍՍ» գործակալությանը հայտնել է «Ռոստեխ» պետական կորպորացիայի գլխավոր տնօրեն Սերգեյ Չեմեզովը:
«Թուրքիայի հետ Ս-400-ների վերաբերյալ կնքված գործարքի արժեքը կազմել է ավելի քան 2 միլիարդ [դոլար – խմբ.՝ Razm.info-ի]», – հայտարարել է Չեմեզով՝ չհաղորդելով այլ մանրամասներ:
Ռուսաստանյան Ս-400 «Տրիումֆ» ՀՕՊ զենիթահրթիռային համակարգ
Դեռևս այս տարվա սեպտեմբերին ՌԴ նախագահի ռազմատեխնիկական համագործակցության հարցերով օգնական Վլադիմիր Կոժինը հայտարարել էր, որ Թուրքիային Ս-400 համակարգերի մատակարարման պայմանագիրը կնքվել է և անցել է կատարման փուլ:
Թուրքիայի նախագահ Ռեջեփ Թայիփ Էրդողանն էլ սեպտեմբերի 12-ին հայտարարել էր, որ Թուրքիան արդեն կանխավճար է տվել Ռուսաստանին այդ համակարգերի համար: Թուրքական կողմը նաև հայտնել էր, որ Ս–400-ների մատակարարումը Թուրքիային կարող է սկվել 2 տարվա ընթացքում:
Թուրքիայի իշխանությունները նաև հայտարարում էին, որ կողմերը բանակցում են Ս-400-ների արտադրական տեխնոլոգիաների փոխանցման վերաբերյալ, սակայն ռուսաստանյան կողմը մի քանի անգամ նշել է, որ տեխնոլոգիաների փոխանցման հարց չի քննարկվում:
Թուրքիան և Ռուսաստանը Ս-400 համակարգերի վաճառքի համար բանակցում են դեռևս 2016-ի հոկտեմբերից: Ամերիկյան «Բլումբերգ» գործակալության տվյալներով՝ Թուրքիան համաձայնվել է Ռուսաստանին վճարել 2,5 միլիարդ դոլար՝ Ս-400 համակարգերի 4 դիվիզիոն ստանալու համար: