Հոկտեմբերի 31-ին Իրանի բանակի ռազմաօդային ուժերը «Ֆադաեյան է հարիմ է վելայաթ – 7» զորավարժության առաջին փուլում F-5 և «Սաեղե» կործանիչներից արձակած ռումբերով խոցել են պայմանական թիրախներ՝ զենքի և վառելիքի պահեստներ, թռիչքուղի, հրթիռների արձակման հրապարակ։ Այս մասին տեղեկացնում է Իրանի բանակի կայքը։
Իրանի ռազմաօդային ուժերը իրականացրել են նաև F-7 կործանիչներով պայմանական հակառակորդի կենդանի թիրախները խոցելու, F-14 կործանիչները օդում լիցքավորելու գործողություններ։
Իրանի բանակի ՌՕՈւ «Ֆադաեյան է հարիմ է վելայաթ – 7» զորավարժությունը մեկնարկել է հոկտեմբերի 31-ին, տևելու է 2 օր։ Զորավարժությանը ցուցադրելու են տեղական արտադրության նոր և արդիականցված զենքեր ու համակարգեր։
Վարժանքներին ներգրավվել են խորհրդային-ռուսաստանյան արտադրության ՍՈւ-24, ՄԻԳ-29, ամերիկյան արտադրության F-4, F-5, F-14, ինչպես նաև իրանական արտադրության «Սաեղե» կործանիչներ, Boeing-707 և Boeing-747 լիցքավորող ինքնաթիռներ, Lockheed C-130 Hercules բեռնատար ինքնաթիռներ և անօդաչու թռչող սարքեր:
Իրանի բանակի ՌՕՈւ «Ֆադաեյան է հարիմ է վելայաթ» զորավարժությունը պլանային է։ Այն անցկացվել է նաև 2016թ. հոկտեմբերի 16-17-ին։