Հոկտեմբերի 30-ին Ռուսաստանի նախագահի՝ Սիրիայի հարցով հատուկ ներկայացուցիչ Ալեքսանդր Լավրենտիևը հայտարարել է, որ Սիրիայի Իդլիբ նահանգում ձևավորված «անվտանգության գոտում» դեռևս ռադիկալ խմբավորումների հարձակումների վտանգ կա: Փոխանցում է ռուսաստանյան «ՌԻԱ Նովոստի» գործակալությունը:
Լավրենտիևը նաև նշել է, որ «ոչ բախումային գոտում» իրադրությունը բարդ է, քանի որ թուրքական կողմը դեռևս չի ավարտել դիտակետերի տեղակայում Իդլիբում:
«Համեմատաբար, լարվածության մակարդակը այնտեղ դեռևս շարունակում է բարձր մնալ և վտանգ կա, որ այնտեղ տեղակայված ռադիկալ խմբավորումները հարձակողական գործողություններ կիրականացնեն: Բայց մենք հուսով ենք, որ Թուրքիայի մեր գործընկերները ամեն դեպքում կիրականանցնեն Իդլիբի հարցով իրենց պարտականությունները և կկայունացնեն այնտեղ իրավիճակը», – հայտարարել է Լավրենտիևը:
Նշենք, որ այսօր՝ հոկտեմբերի 30-ին Աստանայում մեկնարկում է Սիրիայի հարցով բանակցությունների 7-րդ փուլը: Դրանց մասնակցում են ներկայացուցիչներ Թուրքիայից, Իրանից, Ռուսաստանից, Սիրիայի իշխանություններից և զինված ընդդիմությունից, ինչպես նաև ԱՄՆ-ից, Հորդանանից և ՄԱԿ-ից:
Աստանայում այս տարվա բանակցությունների հերթական փուլի ժամանակ վերջնականապես հայտարարվել է Սիրիայում 4 «անվտանգության գոտի» ստեղծելու մասին: Սիրիայում այդ գոտիների և հրադադարի պահպանման երաշխավորներ են Ռուսաստանը, Իրանը և Թուրքիան:
Նշենք, որ թուրքական զինուժը՝ Իդլիբում «կայունություն հաստատելու» պատրվակով հոկտեմբերի 12-ից ներխուժել է Սիրիայի տարածք: Պաշտոնական Դամասկոսը հայտարարել է, որ սա հակասում է Աստանայում ձեռք բերված համաձայնություններին և պահանջել է դուրս բերել զորքերը: Իրանը նույնպես կարծես թե կողմ չի թուրքական զորքերի ներկայությանը, միևնույն ժամանակ ռուսաստանյան կողմի հայտարարությունը թույլ է տալիս պնդել, որ Ռուսաստանը և Թուրքիան համաձայնեցրել են զորքերի տեղակայումը: