Իրաքի կառավարական ուժերը և Իրաքյան Քրդստանի զինված ուժերը (Փեշմերգա) բանակցում են ռազմական գործողությունների ճակատով հրադադար հաստատելու շուրջ: Այս մասին քրդական Rudaw լրատվակայքին հայտնել է ԱՄՆ գլխավորած կոալիցիայի խոսնակը:
Իրականում հարցազրույցի ընթացքում խոսնակ Ռայան Դիլոնը հայտարարել է, թե քրդերի և Իրաքի կառավարական ուժերի միջև հաստատվել է հրադադար, սակայն ավելի ուշ թվիթերի էջում ուղղել է խոսքը՝ նշելով, որ կողմերը բանակցում են, սակայն պաշտոնական հրադադար չկա:
2/2 Both parties talking w/ one another, but not an official “ceasefire.” @CJTFOIR encouraging dialogue w/o further conflict.
— OIR Spokesman (@OIRSpox) October 27, 2017
Թարմացում. Իրաքի վարչապետ Հայդար ալ-Աբադին հրամայել է քրդերի դեմ ռազմական գործողությունները 24 ժամով դադարեցնել: Փոխանցում է Reuters գործակալությունը:
Իրաքյան Քրդստանում անկախության հանրաքվեից հետո առաջին անգամ զինված բախումներ սկսվեցին, երբ հոկտեմբերի 16-ին Իրաքի կառավարական ուժերը քրդական ուժերին դուրս մղեցին նավթային պաշարներով հարուստ Քիրքուքից, ապա բախումներ սկսվեցին Սինջարի լեռների ուղղությամբ, Սիրիա-իրաքյան սահմանին և Քիրքուքից հյուսիս:
Բախումները ապա շարունակվել են Իրաքյան Քրդստանի և Թուրքիայի սահմանային անցակետերի հատվածում, իսկ հոկտեմբերի 27-ի գիշերը, ըստ նույն Rudaw լրատվակայքի, քրդական ուժերը խոցել են ամերիկյան Իրաքի կառավարական ուժերին պատկանող, ամերիկյան արտադրության «Աբրամս» տանկ: