Հոկտեմբերի 24-ին Իրաքյան Քրդստանի կառավարությունն առաջարկել, իսկ ավելի ուշ խորհրդարանն ընդունել է սեպտեմբերի 25-ի անկախության հանրաքվեի արդյունքները սառեցնելու որոշումը: էրբիլը պարտությունների ֆոնին ցանկանում է բանակցություններ սկսել Բաղդադի հետ:
Իրաքի կառավարության հայտարարությունում նշվում է, որ անհրաժեշտ է ժամ առաջ դադարեցնել ռազմական գործողությունները Իրաքի կառավարական ուժերի և քրդական Փեշմերգայի միջև: Քրդական կառավարությունը ներկայացրել էր 3 կետից բաղկացած առաջարկ՝
1. Անհապաղ հրադադար և Քրդական շրջանում բոլոր ռազմական գործողությունների դադարեցում,
2. Դադարեցնել Իրաքյան Քրդստանում անցկացված հանրաքվեի արդյունքները,
3. Սահմանադրության հիման վրա երկխոսություն սկսել Իրաքյան Քրդստանի և Իրաքի Դաշնային կառավարության միջև:
Ավելի ուշ կառավարության առաջարկի հիման վրա Իրաքյան Քրդստանի խորհրդարանն ընդունել է հանրաքվեի արդյունքները 8 ամիս ժամկետով հետաձգելու որոշում:
Հիշեցնենք, որ հոկտեմբերի 16-ին Իրաքի կառավարական բանակը և շիայական «Հաշդ ալ-Շաաբի» խմբավորման ուժերը հարձակվել էին քրդական ուժերի վրա: Շուրջ մեկ շաբաթ տևած գործողություններում Բաղդադը կարողացել է վերահսկողություն հաստատել Քիրքուքում, նավթագազային հանքավայրերում, Սինջարում: Ներկայում իրաքյան ուժերը շարունակում են առաջխաղացումն արդեն հենց քրդական ռեգիոնալ շրջանի տարածքում՝ ընդհուպ ձգտելով մինչև Թուրքիայի սահման: