Թուրքիայի պաշտպանության նախարարն այցելել է թուրք-սիրիական սահման

Հոկտեմբերի 23-ին Թուրքիայի պաշտպանության նախարար Նուրեթթին Ջանիքլին այցելել է երկրի հարավային Հաթայ նահանգի Յայլադաղ գավառ և ստուգումներ է անցկացրել թուրք-սիրիական սահմանին տեղակայված ԶՈւ ստորաբաժանումներում:

Այս մասին հայտնում է Թուրքիայի ՊՆ կայքը:

Հաթայ նահանգ այցի ընթացքում Ջանիքլին նաև այցելել է ցամաքային զորքերի սահմանապահ 3-րդ բրիգադի հրամանատարություն: Պաշտպանության նախարարին ուղեկցել է ներքին գործերի նախարար Սուլեյման Սոյլուն:

Սիրիայի Իդլիբ նահանգում զորքեր տեղակայելու հետ կապված վերջին շրջանում Թուրքիայի զինուժը մեծ թվով զինտեխնիկա և զինծառայողներ է տեղափոխել Հաթայ նահանգ, սահմանային ստորաբաժանումներում համալրումները գրեթե ամեն օր են իրականացվում:

Նշենք, որ Հաթայ նահանգը անմիջապես սահմանակից է ինչպես Իդլիբ նահանգին, այնպես էլ Աֆրին շրջանին, որը ներկայում վերահսկում են քրդական ուժերը:

Հոկտեմբերի 12-ին Թուրքիան, հետախուզական գործողությունից հետո, զորքեր է մտցրել Իդլիբ, որոնք տեղակայվել են Իդլիբ-Աֆրին սահմանի երկայնքով: Բացի այդ Թուրքիայի զինուժի և նրանց աջակցող զինյալ խմբավորումների վերահսկության ներքո է գտնվում Ջերաբլուսից Ազեզ ընկած հատվածը, որը թուրքական զինուժը գրավել է «Իսլամական պետություն» ահաբեկչական խմբավորումից 2016-ի օգոստոս – 2017-ի մարտ ամիսներին իրականացված «Եփրատի վահան» գործողության ընթացքում:

Միևնույն ժամանակ, թուրքական կողմը ամենաբարձր մակարդակներով մշտապես հայտարարում է, որ հնարավոր է նոր գործողություններ սկսի Սիրիայի հյուսիսում՝ մասնավորապես Աֆրինում և Մանբիջում, Սիրիայի քրդական «Ժողովրդավարական միություն կուսակցություն» (PYD) խմբավորման և դրա ռազմական թև «Ժողովրդական ինքնապաշտպանության ջոկատների» (YPG) դեմ պայքարելու նպատակով:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *