Սիրիայի Դեր Զոր նահանգում ահաբեկիչների դեմ մղած մարտերի ընթացքում զոհվել է Իրանի իսլամական հեղափոխության պահապանների կորպուսի (ԻՀՊԿ) 40-ամյա զինծառայող Հոսեյն Աղադադին։
Հոսեյն Աղադադին ԻՀՊԿ՝ Իրանի Սպահան նահանգում տեղակայված 40-րդ ինժեներական բրիգադի զինծառայող է եղել։ Այս մասին հոկտեմբերի 20-ին տեղեկացնում է իրանական «Ֆարս» լրատվական գործակալությունը։
Սիրիայում սպանված ԻՀՊԿ զինծառայող Հոսեյն Աղադադին
Հիշեցնենք, որ ավելի վաղ Սիրիայում Իրանը մեկ գեներալ էր կորցրել։
Իրանը Սիրիայի ներկայիս կառավարության դաշնակիցներից մեկն է: Չնայած Սիրիայում պարբերաբար իրանցի մարտիկներ են զոհվում՝ սիրանական իշխանությունները հերքում են իրենց ռազմական ներկայությունն այդ երկրում:
Իրանցի պաշտոնյաները նշում են, որ Թեհրանը Սիրիայում չունի մարտական ստորաբաժանումներ, ու Սիրիա է ուղարկում միայն ռազմական խորհրդատուներ։
Հավելենք, որ հոկտեմբերի 17-ին ԱՄՆ աջակցությամբ գործող արաբներից և հիմնականում քրդերից կազմված «Սիրիայի դեմոկրատական ուժերը» (SDF) «Իսլամական պետություն» ահաբեկչական խմբավորումից ազատագրել են Ռաքքա քաղաքը, որը ԻՊ-ն հռչակել էր «խալիֆայության մայրաքաղաք»։
Ռաքքայից բացի ԻՊ-ն շարունակում է տարածքներ կորցնել Սիրիայում իր վերջին հենակետ Դեր Զոր նահանգում։