Թուրքիայի անվտանգության գլխավոր տնօրինության (ոստիկանություն) սպառազինությանն է հանձնվել տեղական արտադրության 40 միավոր «Քիրփի» (Kirpi) զրահամեքենա: Այս մասին հայտնում է Թուրքիայի պաշտպանական արդյունաբերության գլխավոր վարչությունը:
EGM Mayına Karşı Korumalı Araç Projesi kapsamında 40 adet KİRPİ'nin kabulleri başarıyla tamamlandı. pic.twitter.com/hWUbXWeUaH
— SSM (@SavunmaSanayii) October 19, 2017
4×4 անվային ընթացամասով բարձրացված հակաականային պաշտպանվածությամբ «Քիրփի» զրահամեքենաները արտադրում է թուրքական BMC ընկերությունը: Այս զրահամեքենան կարող է տեղափոխել 10-13 զինծառայող, շարժիչի հզորությունը՝ 375 ձիաուժ է:
Բացի «Քիրփի» զրահամեքենաներից, այս ընկերությունը նաև արտադրում է 4×4 անվային ընթացամասով 250-10Զ «Վուրան» բազմանպատակային զրահամեքենաներ, EFE 235-16 4×4 անվային ընթացամասով բեռնատարներ, 380-26P բեռնատարներ՝ 6×6 անվային ընթացամասով:
Հիշեցնենք, որ 2013-ին «Քիրփի» զրահամեքենաների փոխանցումների զգալի ուշացումների պատճառով Թուրքիայի պաշտպանության նախարարությունը չեղյալ հայտարարեց զրահամեքենաների ձեռքբերման պայմանագիրը, ինչի հետևանքով ընկերությունը ծանր ֆինանսական դրության մեջ հայտնվեց ու կուտակեց հսկայական պարտքեր: Դրանից հետո այն հանվեց աճուրդի ու վաճառվեց Էրդողանի մտերիմին: