Ղազախաստանի Ալմաթի քաղաքի մոտ տեղակայված զորավարժարաններում շարունակվում է ՀԱՊԿ խաղաղապահական ուժերի «Անքակտելի եղբայրություն-2017» զորավարժությունը: Վարժանքները մեկնարկել են հոկտեմբերի 16-ին և կշարունակվեն մինչև հոկտեմբերի 20-ը: Այս մասին հայտնում է ՀԱՊԿ կայքը:
Հավաքական անվտանգության կազմակերպության երկրների խաղաղապահական ստորաբաժանումները վարժանքների ընթացքում խաղարկել են տեխնիկայի շարասյուն կազմելու, պահպանության ապահովման, տեղանքի և շարժման երթուղիների հետախուզման առաջադրանքներ:
ՀՀ ԶՈւ խաղաղպահները՝ Ղազախստանում անցկացվող ՀԱՊԿ զորավարժությանը. 18.10.2017 թ.
Վարժանքների այս փուլում հետախուզման համար կիրառվել են անօդաչու թռչող սարքեր: Անցկացվել են նաև ինքնաշեն պայթուցիկ նյութերի հայտնաբերման և ոչնչացման, բնակավայրում պարեկություն անելու, վիրավորների օդային տարհանման, ճանապարների արգելափակման գործողություններ:
ՀԱՊԿ խաղաղապահական ուժերը սրանցից բացի նաև կատարել են անօրինական զինված խմբավորումների կրակային դարանից դուրս գալու, այդ նահանջող խմբերի հետապնդման առաջադրանքներ:
Վարժանքներին ներգրավված է ՀԱՊԿ անդամ երկրների զինված ուժերի ավելի քան 1500 զինծառայող, 200 միավոր զինտեխնիկա, 14 միավոր թռչող սարք: Զորավարժությանը մասնակցում է նաև ՀՀ ԶՈւ խաղաղապահ ստորաբաժանում:
«Անքակտելի եղբայրությունը» ՀԱՊԿ անդամ երկրների զինված ուժերի «Մարտական եղբայրություն-2017» օպերատիվ-մարտավարական զորավարժության փուլերից մեկն է: Այս վարժանքները Հայաստանի տարածքում անցկացված «Փոխգործակցություն-2017» և Ռուսաստանում ու Հայաստանում անցկացված «Որոնում-2017» զորավարժությունների տրամաբանական շարունակությունն են: