Սիրիայում սպանվել է Իրանի իսլամական հեղափոխության պահապանների կորպուսի (ԻՀՊԿ) գեներալ, իրան-իրաքյան պատերազմի վետերան Աբադոլլահ Խոսրավին։ Այս մասին հոկտեմբերի 15-ին տեղեկացնում է իրանական «Մեհր» լրատվական գործակալությունը։
Խոսրավին Սիրիայում սպանված 11-րդ իրանցի գեներալն է։
Սիրիայում սպանված իրանցի գեներալ Աբադոլլահ Խոսրավին
Ըստ իրանական «Թաբնաք» լրատվական գործակալության՝ Խոսրավին Իրանի Արաք քաղաքից էր և ԻՀՊԿ Բասիջ ստորաբաժանման «Ֆաթեհին» գումարտակի հրամանատարը։
2017-ի հունվարին Սիրիայում սպանվել էր ԻՀՊԿ գեներալ Ղոլամալի Ղոլիզադեն։
Իրանը Սիրիայի ներկայիս կառավարության դաշնակիցներից մեկն է, և չնայած Սիրիայում պարբերաբար Իրանի կողմից ուղարկված մարտիկներ են զոհվում՝ այնուամենայնիվ իրանական իշխանությունները մշտապես հերքում են իրենց ռազմական ներկայությունն այդ երկրում:
Իրանցի պաշտոնյաները նշում են, որ Թեհրանը Սիրիայում չունի մարտական ստորաբաժանումներ, ու Սիրիա է ուղարկում միայն ռազմական խորհրդատուներ։