«Իսլամական պետություն» ահաբեկչական խմբավորումը Հավիջան կորցնելուց հետո Իրաքում վերահսկում է 2.9 տոկոս տարածք՝ Անբարի արևմուտքում՝ Վերին Եփրատում, ալ-Կաիմում և Ռավայում։ Այս մասին հայտարարել են Իրաքի բանակի հրամանատարությունից։ Հոկտեմբերի 12-ին տեղեկացնում է Iraqinews լրատվակայքը։
Իրաքյան բանակը այժմ պատրաստվում է ազատագրել երկրում ԻՊ ձեռքում մնացած վերջին տարածքները։
Իրաքի կառավարական ուժերը՝ Թալ Աֆարի գրոհի ընթացքում
Իրաքի բանակի հրամանատարությունից հայտնել են նաև, որ «Իսլամական պետության» վերջին հենակետերից Հավիջայի շրջանի ազատագրման գործողության ընթացքում սպանվել է 1316 ԻՊ զինյալ։
Նշենք, որ Հավիջայի շրջանը գտնվում է քրդերի վերահսկողության տակ գտնվող, նավթով հարուստ Քիրքուքի շրջանից հարավ-արևմուտք։ Վերահսկողություն հաստատելով Հավիջայի նկատմամբ՝ իրաքյան ուժերը մոտենում են Քիրքուքին։
Իրաքյան Քրդստանը արդեն քանիցս հայտարարում է, որ Իրաքի բանակը հարձակում է նախապատրաստում Քիրքուքի վրա և ուժեր է կենտրոնացրել Քիրքուքի մոտակայքում։ Քիրքուքը պաշտպանելու նպատակով քրդերը արդեն զորքեր են տեղակայել այնտեղ։
Իրաքյան կողմը պնդում է, սակայն, որ Քիրքուքում գործողություններ չի նախատեսում, և Հավիջայի գործողությունների շրջանակներում ընդամենը շարունակում են «Իսլամական պետություն» ահաբեկչական խմբավորումից մաքրել ազատագրված տարածքները։
Հավիջա քաղաքը Իրաքում «Իսլամական պետության» վերահսկած վերջին կարևոր բնակավայրերից էր: Քաղաքը «Իսլամական պետության» ձեռքում էր 2014 թվականից։ Հավիջայի ազատագրման գործողությունները սկսվել էին 2017-ի սեպտեմբերի վերջից։
«Իսլամական պետությունը» Իրաքում կորցրել է իր վերահսկած կարևոր տարածքների մեծ մասը: Վերջին մի քանի ամիսներին Իրաքի կառավարական բանակին հաջողվել է ԻՊ զինյալներից ազատագրել ռազմավարական կարևոր նշանակություն ունեցող Մոսուլ և Թալ-Աֆար քաղաքները, մի շարք այլ բնակավայրեր: