Իրաքյան Քրդստանը նախապատրաստվում է նավթով հարուստ Քիրքուք շրջանի վրա հնարավոր հարձակումներին դիմակայելուն. Քիրքուքում և դրա շրջակայքում արդեն «Փեշմարգայի» «տասնյակ հազարավոր» զինծառայողներ են տեղակայվել, որոնց հինգշաբթի երեկոյան ավելացվել է լրացուցիչ ևս 6000 զինծառայող։ Այս մասին հայտարարել են Իրաքյան Քրդստանի ղեկավարությունից։ Հոկտեմբերի 13-ին փոխանցում է քրդական Rudaw լրատվական գործակալությանը։
Հոկտեմբերի 11-ին Իրաքյան Քրդստանի անվտանգության խորհուրդը հայտարարել էր, որ տեղեկություններ է ստացել, թե իրաքյան բանակը՝ ներառյալ ժողովրդական մոբիլիզացիոն ուժերը և դաշնային ոստիկանությունը, նախապատրաստվում է խոշոր հարձակում իրականացնել Քիրքուքի հարավ-արևմուտքում և Մոսուլի հյուսիսում։
Սակայն Իրաքի բանակից հերքել էին այդ տեղեկությունները։
Over 100,000 #Peshmerga soldiers are protecting #Kirkuk and all of them are in defensive mode after an order from President Masoud Barzani. pic.twitter.com/e6v4vuMCw1
— Lawk Ghafuri (@LawkGhafuri) October 12, 2017
Քրդերի այս հայտարարությանը անդրադարձել է նաև Իրաքի վարչապետ Հեյդար ալ-Աբադին, ով հայտարարել է, որ չեն պատրաստվում կռվել քրդերի դեմ։
«Մենք մեր բանակը չենք օգտագործելու մեր ժողովրդի դեմ կամ մեր քուրդ և այլ քաղաքացիների դեմ պատերազմելու համար», – ասել է Հեյդար ալ-Աբադին։
Չնայած այս հերքումներին՝ քրդերը շարունակում են պնդել, որ Իրաքի իշխանությունները հարձակում են նախապատրաստում Քիրքուքի վրա։
Հոկտեմբերի 13-ին «Փեշմարգայի» հրամանատարը հայտարարել է, որ հինգշաբթի գիշերվանից սկսած Իրաքի բանակը և շիայական, Իրանի կողմից հովանավորվող «Հաշդ աշ-շաաբի» ջոկատները նախապատրաստվում էին հարձակվել Քիրքուքի շրջակայքի վրա։
Իրաքը, հերքելով այս լուրը, հայտարարել է, որ Հավիջայի գործողությունների շրջանակներում ընդամենը շարունակում են «Իսլամական պետություն» ահաբեկչական խմբավորումից մաքրել ազատագրված տարածքները։
The outskirts of #Kirkuk right now. #Iraq Army 9th Div. pic.twitter.com/7N55z21bmH
— Iraq Day (@iraq_day) October 12, 2017
Հիշեցնենք, որ սեպտեմբերի 27-ին, Իրաքի խորհրդարանը երկրի վարչապետին լիազորել էր զորքել ուղարկել Քիրքուք, որը նույնպես մասնակցել էր սեպտեմբերի 25-ի քրդական անկախության հանրաքվեին:
Ընդունված փաստաթղթի մեջ նշվում է, որ խորհրդարանը երկրի վարչապետին լիազորում է նաև կանխարգելել այդ տարածքներ այլ ուժերի ներխուժումը: Սա, ըստ երևույթին, ուղղված է քրդական «Փեշմարգա» ջոկատների դեմ:
Նշենք, որ Քիրքուքը նավթի պաշարներով հարուստ շրջան է և Իրաքի կենտրոնական անկախության և Իրաքյան Քրդստանի միջև տարաձայնությունների հիմնական պատճառներից մեկն է: Քիրքուքը ևս նեռարված է եղել անկախության հանրաքվեին մասնակցող տարածքների մեջ: Այս շրջանը «Իսլամական պետություն» ահաբեկչական խմբավորման ներխուժումից 2014-ին պաշտպանել էին հենց քրդական զինված ուժերը: