Ռուսաստանի ԶՈւ օդադեսանտային ուժերի և Բելառուսի ԶՈւ հատուկ գործողությունների ուժերի ստորաբաժանումները դեսանտավորվել են պայմանական հակառակորդի օդանավակայանում, այնուհետև ուղևորվել մարտական գործողությունների վայր։ Այս մասին հոկտեմբերի 10-ին տեղեկացնում է ռուսաստանյան «ՌԻԱ նովոստի» լրատվական գործակալությունը։
Դեսանտավորումն իրականացվել է Իլ-76 ինքնաթիռներից։ Օգտագործվել են Դ-10, Դ-6 պարաշյուտներ։ Վարժանքներն անցկացվել են Պսկովի շրջանում:
Օդանավակայանը գրավելուց հետո, դեսանտայինները գրավել են նաև պայմանական հակառակորդի մատակարարման բազան։ Այս գործողությունների ընթացքում զինծառայողները ոչնչացրել են նաև հակառակորդի դիվերսիոն խմբերը։
Ռուսաստանի ԶՈւ օդադեսանտային ուժերի և Բելառուսի ԶՈւ հատուկ գործողությունների ուժերի ստորաբաժանումների զորավարժությունը մեկնարկել է հոկտեմբերի 9-ին և տևելու է մինչև հոկտեմբերի 11-ը։ Զորավարժությանը ներգրավված է 1000 զինծառայող, 200 միավոր զինտեխնիկա։
Հավելենք, որ սեպտեմբերի 14-20-ը Ռուսաստանում և Բելառուսում անցկացվում էր ռուս-բելառուսական «Արևմուտք-2017» զորավարժությունը։