Հայկական «65 Ռազմական գործարան» ընկերությունը 2012 թվականից առ այսօր կատարել է զենքի արտադրության 957 մլն 893 հազար դրամի (առանց՝ ԱԱՀ-ի, դոլարային փոխարժեքով՝ շուրջ 2 մլն) պետական պատվերով նախատեսված պայմանագրային աշխատանքներ: Այս մասին հայտնի է դառնում ՀՀ կառավարության առաջիկա նիստի օրակարգի փաստաթղթերից:
Ըստ տարիների՝ մատակարարված արտադրանքի ծավալներն են.
2012 | 119 321 000 |
2013 | 158 618 000 |
2014 | 184 249 000 |
2015 | 243 800 000 |
2016 | 251 905 000 |
Այս հիմնավորումով ՀՀ պաշտպանության նախարարությունը կառավարությանն առաջարկում է 5 տարով երկարացնել ընկերության՝ ռազմամթերքի արտադրության արտոնագիրը:
«65 Ռազմական գործարանը» 100 % պետական մասնակցությամբ ընկերություն է, որը կառավարում է ՀՀ ՊՆ-ն: Ընկերությունը հիմնականում զբաղվում է հրաձգային զենքի, հրետանու առանձին համակարգերի նորոգմամբ և զորքերում տեխնիկական սպասարկման աշխատանքներով, ավիացիոն խոցման միջոցների արտադրությամբ:
Նշվում է, որ որոշման նախագծի ընդունումով պետության հնարավորությունների շրջանակներում կընդլայնվի արտադրության տեսականին և Հայաստանի զինված ուժերը և այլ զորքերը կապահովվեն ժամանակակից սպառազինությամբ և զինտեխնիկայով:
Դեռևս 2017-ի օգոստոսի 10-ին ՀՀ կառավարությունը հավանության էր արժանացրել որոշման նախագիծը, որով նախատեսվում էր միավորել «Գառնի լեռ» և «65 ռազմական գործարան» ընկերությունները:
Հիմնավորման մեջ ասվում էր, որ «Գառնի-Լեռ» ընկերությունում գործում է Հայաստանում միակ հրաձգային զենքի փողերի արտադրության տեղամասը, որի միջոցով իրականացվում են ՀՀ ՊՆ-ի պատվերները: Իսկ 65 ռազմական գործարանն ունի ավելի մեծ տարածք և հզորություն:
Իսկ «Գառնի-Լեռ» գիտաարտադրական միավորում» ընկերությունը 2012 թվականից կատարել է զենքի արտադրության 1 մլդր 496 մլն 161 հազար դրամի պետական պատվերով նախատեսված պայմանագրային աշխատանքներ: