Հոկտեմբերի 10-ին Դաղստանում անցկացված հակաահաբեկչական գործողությունների ընթացքում Ռուսաստանի ուժայինները վնասազերծել են 2 ահաբեկչի: Այս մասին հայտնել է ՌԴ ազգային հակաահաբեկչական կոմիտեի տեղակատվական կենտրոնը, փոխանցում է «ՌԻԱ Նովոստի» գործակալությունը:
Ռուսաստանի ՆԳՆ հատուկ նշանակության ստորաբաժանումների զինծառայողները Հյուսիսային Կովկասում հակաահաբեկչական գործողությունների ռեժիմի ժամանակ. նկարը՝ «ՏԱՍՍ» գործակալության
Հակաահաբեկչական գործողությունների ռեժիմ Դաղստանի Շամիլսկի շրջանում հայտարարվել է հոկտեմբերի 9-ի լույս 10-ի գիշերը:
Հոկտեմբերի 1-ին հակաահաբեկչական գործողությունների ռեժիմ էր հայտարարվել նաև Բաբայուրտովսկի և Կիզիլյուրտ շրջաններում: Իսկ ավելի վաղ՝ սեպտեմբերի սկզբին, ՌԴ ուժայինները սպանել էին ահաբեկչական գործողություններին մասնակցող խմբավորումներից մեկի ղեկավարին:
Դաղստանում և առհասարակ Ռուսաստանի մյուս կովկասյան տարածքներում ահաբեկչական կազմակերպությունները ստեղծում են մասնաճյուղեր, որպեսզի տեղացիներին հավաքագրեն և ընդունեն իրենց շարքերը: Այդ պատճառով հենց Դաղստանում հաճախակի բախումներ են լինում ուժայինների և տեղացի զինյալների միջև:
Դաղստանից և կովկասյան տարածաշրջանից դուրս եկած զինյալների մեծ մասը կռվում է Սիրիայում և Իրաքում ահաբեկչական խմբավորումների կազմում: