2018-ին ՊՆ հետազոտական աշխատանքների հատկացումները կավելանան շուրջ 48%-ով. նախագիծ

Ըստ 2018 թվականի պետական բյուջեի նախագծի՝ կտրուկ՝ շուրջ 48.2 %-ով աճել են պաշտպանության ոլորտում հետազոտական և նախագծային աշխատանքների համար նախատեսված ծախսերը: Այն կազմում է 2 մլրդ 433 մլն 461 հազար դրամ: Այս մասին հայտնի է դառնում 2018 թվականի պետբյուջեի նախագծից, որով ողջ պաշտպանական բյուջեն կազմում է 246 մլրդ 868 մլն դրամ:

[Լրացում] Նոյեմբերի 12-ին Հայաստանի Ազգային ժողովն ընդունել է 2018 թվականի պետբյուջեի մասին օրինագիծը, որով 2018-ին պաշտպանության ոլորտի ծախսերին կհատկացվի 247 մլրդ 895 մլն դրամ: Հետազոտական և նախագծային աշխատանքներին կուղղվի 2 մլրդ 433 մլն 461 հազար դրամ: ]

Նշենք, որ նախորդ տարիներին՝ 2016-ին և 2017-ին այս նպատակով  ի սկզբանե նախատեսվել էր հատկացնել շուրջ 1 մլրդ 641 մլն դրամ: Իսկ 2016-ին ծախսերը կատարվել են անգամ ավելի քիչ՝ 1 մլրդ 623 մլն դրամի չափով:

Նշենք, որ ՀՀ ռազմարդյունաբերական կոմիտեն մշակել և օրերս քննարկման է ներկայացրել ռազմարդյունաբերական համալիրի զարգացման պետական ծրագիրը:

Ոլորտի զարգացման ծրագրի մշակման մասին դեռևս 2017-ի հունիսին Ռազմինֆոյին հայտնել էր ՌԱՊԿ նախագահի օգնական Ավետիք Քերոբյանը: Այն պարունակում է կոնկրետ ֆինանսական, տնտեսական և կրթական ծրագրեր:

Պաշտոնյայի խոսքով՝ ծրագրի մշակումը բխում է ՀՀ նախագահի կողմից հաստատված ռազմարդյունաբերության և ռազմատեխնիկական քաղաքականության ռազմավարությունից: Այս ռազմավարությունը նախագահը ստորագրել է 2017 թ. հունվարին:

«Դա իր մեջ ունի կոնկրետ ծրագրեր: Այդ ռազմավարությունն իր մեջ ներառում է և՛ ռազմատեխնիկական ուղղությունները, որոնք պետք է զարգացվեն, և՛ ռազմակրթական ուղղությունները, և՛ ռազմական գիտության զարգացման ուղղությունները», — նշել էր Քերոբյանը:

Սեպտեմբերի 19-ին «Հայաստան-Սփյուռք» համաժողովի շրջանակներում «Ի-վի Քոնսալթինգ» ՓԲԸ տնօրեն Մանուկ Հերգնյանը զեկույց էր ներկայացրել, որում նշված էր, որ հատուկ նշանակության հետազոտությունների և մշակումների ֆինանսավորման ծավալը Հայաստանում էական աճի կարիք ունի։

Հայաստանի այս ոլորտում ծախսերի թիվը նշված չէ գաղտնիությունից ելնելով

Հայաստանի այս ոլորտում ծախսերի թիվը նշված չէ գաղտնիությունից ելնելով

Նախագծով նախատեսված պաշտպանական բյուջեին կարող եք ծանոթանալ այստեղ:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *