Թուրքական TAI ավիաշինական ընկերությունը 2 նոր ուղղաթիռի արտադրության նախագիծ է սկսել: Դրանցից մեկը թուրք-իտալական T-129 «Աթաք» հարվածային ուղղաթիռի արդիականացում է, իսկ մյուսը՝ 10 տոննա քաշով բազմանպատակային ուղղաթիռ: Այս մասին հայտարարել է TAI ընկերության գլխավոր տնօրեն Թեմել Քոթիլը. փոխանցում է թուրքական «Անադոլու» գործակալությունը:
Թուրք-իտալական համատեղ արտադրության T129 «Աթաք» ուղղաթիռ
Նա նաև հայտարարել է, որ ավիաշինական ընկերությունը սկսել է նոր անօդաչու թռչող սարքի նախագծման աշխատանքները: Նոր ԱԹՍ-ն կարողանալու է ավելի ծանր քաշով բեռ կրել:
Հիշեցնենք, որ դեռևս 2015-ի դեկտեմբերին TAI ընկերությունը դեռևս նախագծման փուլում գտնվող թեթև բազմանպատակային ուղղաթիռի շարժիչների գնման համար պայմանագիր է ստորագրել Rolls-Royce և Honeywell International ընկերությունների համատեղ LHTEC ձեռնարկության հետ։ Չի բացառվում, որ խոսքը հենց այս բազմանպատակային ուղղաթիռի նախագծի մասին է;
Նշենք, որ ներկայում Թուրքիայի ցամաքային զորքերում առկա է 24 միավոր թուրք-իտալական համատեղ արտադրության «Աթաք» հարվածային ուղղաթիռ: Թուրքիայի զինուժը այդ ուղղաթիռները օգտագործում է «Քրդստանի աշխատավորական կուսակցության» (PKK) դեմ գործողություններում:
T-129 Atak հարվածային ուղղաթիռի ՄՏԲ.
- Թռիչքի առավելագույն արագությունը՝ 269 կմ/ժ,
- Առավելագույն բեռնատարողությունը՝ 1200 կգ,
- Թռիչքի առավելագույն բարձրությունը՝ 6 կմ,
- Գործողության իրականացման առավելագույն բարձրությունը՝ 3 կմ
- Մեկ լիցքավորմամբ հաղթահարվող տարածությունը՝ 561 կմ:
TAI ընկերությունը զբաղվում է նաև «Անքա» անօդաչու թռչող սարքերի արտադրությամբ: Այս ԱԹՍ-ները ևս ներգրավված են քրդերի դեմ ռազմական գործողություններում: