Իրաքյան Քրդստանում անցկացվող անկախության հանրաքվեի հետ կապված Իրաքի խորհրդարանը երկրի վարչապետից պահանջել է զորքեր ուղարկել քրդերի վերահսկողության տակ գտնվող տարածքներ: Այս մասին հայտնում է«Ֆրանս պրեսս» գործակալությունը:
Բանաձևի մեջ նշվում է, որ խորհրդարանը երկրի ԶՈւ գլխավոր հրամանատարից (վարչապետ Հայդար ալ-Աբդաիից) պահանջում է ուժեր ուղարկել 2003 թվականից Քրդստանի ինքնավար շրջանի մեջ մտած բոլոր տարածքներ:
Ռազմական բախման ռիսկերի մասին հարցին Իրաքի վարչապետի խոսնակի պատասխանել է, որ եթե այդ տարածքներում բախումներ լինեն, արդեն դաշնային ուժերի գործը կլինի օրենքը կիրառել:
Իրաքի բանակի կողմից կռվող, հիմնականում շիաներից, եզդիներից և քրիստոնյաներից կազմված «Հաշդ աշ-շաաբի» կազմավորման հրամանատարներից մեկը հայտարարել է, որ իրենց հաջորդ առաջադրանքը լինելու է Քիրքուքը և վիճելի տարածքները, որոնք «ապօրինի զինված խմբավորումները» զավթել են և չեն ենթարկվում բանակի հրամանին:
Ավելացնենք նաև, որ քրդական Rudaw լրատվական գործակալությունն էլ իր հերթին հայտնում է, որ Իրաքի վարչապետը երկրի խորհրդարանի պահանջով հրամայել է ուժեր ուղարկել վիճելի տարածքներ:
#Breaking: At the request of parliament, Iraqi PM Abadi has ordered troops to disputed areas to ‘protect citizens.’ pic.twitter.com/AFyNMJE9nl
— Rudaw English (@RudawEnglish) September 25, 2017
Քիրքուկի ղեկավար Նաջմալդին Քարիմը սթափության և խաղաղության կոչ է արել, ինչպես նաև քննադատել է Իրաքի խորհրդարանի այս պահանջը և վարչապետի որոշումը:
Հիշեցնենք, որ այսօր՝ սեպտեմբերի 25-ին, մեկնարկել է Իրաքյան Քրդստանի անկախության հանրաքվեն, որին դեմ են արտահայտվել նրա բոլոր հարևանները, ինչպես նաև սպառնացել են պատերազմով (1, 2, 3, 4):