Իրաքյան Քրդստանում անցկացվող անկախության հանրաքվեին զուգահեռ Թուրքիայի նախագահ Ռեջեփ Թայիփ էրդողանը սպառնացել է դադարեցնել նավթի արտահանումը Թուրքիայի տարածքով: «Անկախ արդյունքից, չենք ճանաչում հանրաքվեի արդյունքները»,–նշել է էրդողանը: Թուրքիայի նախագահի հաղորդագրությունը փոխանցել է թուրքական պետական TRT հեռուստաընկերության կայքը:
Ռուսաստանյան «Սպուտնիկ» գործակալության թուրքական ծառայությունը փոխանցում է, որ, անդդրադառնալով Իրաքյան Քրդստանի հանրաքվեին, Էրդողանը հայտարարել է.
«Տեսնենք Հյուսիսային Իրաքի ղեկավարությունը նավթը ի՞նչ խողովակներով կվաճառի. փականը մեզ մոտ է»:
Թուրքիայի նախագահը ևս հայտարարել է, որ անկախության հանրաքվեն անօրինական է: Թուրքիայի վարչապետ Բինալի Յըլդըրըմն իր հերթին նշել է, որ իրենք նավթի շուրջ միայն Իրաքի հետ կհամագործակցեն: Թուրք պաշտոնյան ավելացրել է, որ իրենք «պատերազմի չեն պատրաստվում»:
Ավելացնենք, որ Իրաքյան Քրդստանի վարչապետ Նեչիրվան Բարզանին հայտարարել է, որ հանրաքվեն Թուրքիայի անվտանգությանը չի սպառնում: