Ռուսաստանի զինված ուժերի Միջազգային հակաականային կենտրոնի կողմից պատրաստված Սիրիայի բանակի սակրավորները մասնակցելու են Դեր Զոր քաղաքի ականազերծման աշխատանքներին: Այս մասին հայտնել է Սիրիայում ՌԴ ԶՈւ ականազերծման կենտրոնի հրամանատար Անատոլիի Մորոզովը, փոխանցում է «ՌԻԱ Նովոստի» գործակալությունը:
Նա հայտնել է, որ Սիրիայում ՌԴ ԶՈւ ականազերծման կենտրոնը Սիրիայի բանակի սակրավորների պատրաստելու ընթացքում հաշվի առնում Սիրիայի տարածքում «Իսլամական պետություն» ահաբեկչական խմբավորման զինյալների օգտագործած պայթուցիկ նյութերի, հիմնականում ինքնաշեն պայթուցիկ սարքերի առանձնահատկությունները:
Հիշեցնենք, որ սեպտեմբերի 11-ին ՌԴ ԶՈւ Միջազգային հակաականային կենտրոնի 40 մասնագետ ուղարկվել է Սիրիա՝ Դեր Զորի ականազերծման մասշտաբները հստակեցնելու համար: Դեր Զորի ականազերծման համար ընդհանուր առմամբ նախատեսվում է սիրիա ուղարկել ականազերծման 175 մասնագետ, 42 միավոր հատուկ տեխնիկա, այդ թվում՝ «Ուրան-6» ռոբոտիզացված համակարգեր:
Սիրիայի Դեր Զոր նահանգի մեծ մասը դեռևս գտնվում է ԻՊ զինյալների ձեռքում: Այդ հատվածում Սիրիայի կառավարական բանակի ձեռքում է Դեր Զոր քաղաքը: Քաղաքի կենտրոնում տեղակայված էր Սիրիայի բանակի զորախումբ, որը մինչև 2017-ի սեպտեմբեր գտնվում էր «Իսլամական պետության» շրջափակման մեջ՝ շուրջ 3 տարի:
ՌԴ ԶՈւ ականազերծման մասնագետները ականազերծման աշխատանքներ են կատարել նաև Սիրիայի Հալեպ և Պալմիրա քաղաքների տարածքներում: