ՀՀ ՊՆ տեղակալ Դավիթ Փախչանյանը հայտնել է, որ Հայաստանին գնումների տեսակետից հետաքրքրում են մեծ քանակությամբ հակաօդային պաշտպանության, հակատանկային և այլ համակարգեր։ Այս մասին փոխնախարարը հայտնել է «Այսօր» լրատվակայքին։
ՀՀ ՊՆ ռազմական արդյունաբերության պետական կոմիտեի նախագահը նշել է, որ Հայաստանը սպառազինություն գնելիս նախ ելնում է իր կարիքներից, դիտարկում այն, ինչ անհրաժեշտ է բանակին, ապա նոր գին-որակ հարաբերակցությունից, սահմանափակումներից և որոշակի քաղաքական նկատառումներից։
Փոխնախարարի խոսքով՝ Հայաստանը առավելապես հետաքրքրված է ռուսաստանյան արտադրության մեկ ՀՕՊ միջոցով, որը ամենից շատն է համապատասխանում հայկական բանակի կարիքներին։
Այն կախված է տարբեր պարամետրերից՝ գնի-որակի հարաբերակցություն, լեռնային պայմաններում օգտագործում, մոբիլություն, հեռավորություն և այլն։
Փոխնախարարը, սակայն, չմանրամասնեց, թե որ միջոցի մասին է խոսքը։