Օգոստոսի 6-ին Իրանի նորընտիր նախագահ Հասան Ռոհանիի երդման պաշտոնական արարողությանը մասնակցելու նպատակով աշխատանքային այցով Թեհրանում գտնվող նախագահ Սերժ Սարգսյանը հանդիպել է նախագահ Ռոհանիի հետ: Այս մասին տեղեկացնում է ՀՀ նախագահի պաշտոնական կայքը։
Հանդիպմանը երկու երկրների նախագահները քննարկել են ինչպես երկկողմ, այնպես էլ բազմակողմ փոխգործակցությանը վերաբերող հարցեր:
Կողմերն անդրադարձել են նաև տարածաշրջանային անվտանգության խնդիրներին, այդ թվում` Լեռնային Ղարաբաղի հակամարտության բանակցային գործընթացին:
Նախագահ Սերժ Սարգսյանը ներկայացրել է այդ գործընթացի ներկա վիճակն ու Հայաստանի դիրքորոշումը` հակամարտությունը բանակցությունների միջոցով ԵԱՀԿ ՄԽ համանախագահության շրջանակներում խաղաղ ճանապարհով լուծելու վերաբերյալ:
Իրանի նախագահն ընդգծել է, որ ԼՂ հակամարտության լուծումը կարող է լինել բացառապես քաղաքական ճանապարհով և իր երկրի համար կարևոր է տարածաշրջանի խաղաղությունն ու կայունությունը:
Իրանի իսլամական հանրապետության համար շատ կարևոր է, որ երկրի սահմմաները անվտանգ լինեն և հույս ունենք, որ երկու հարևան երկրների՝ Հայաստանի ու Ադրբեջանի ջանքերով այս խնդրի խաղաղ կարգավորմանը ականատես կլինենք,- ասել է Հասան Ռոհանին։