Հուլիսի 31-ին Վրաստանի վարչապետի ընդունած որոշմամբ Վրաստանի պաշտպանության, ներքին գործերի, պատիժների իրականացման և պրոբացիայի նախարարություններում և պետանվտանգության ծառայությունում մեկնարկել է զորակոչը:
Որոշումը հրապարակվել է Վրաստանի պետական օրենսդրական տեղեկագրում:
Զորակոչիկների թիվը, համեմատած գարնանային զորակոչի հետ, աճել է մոտ 10 տոկոսով: Երկրի զինված ուժերի շարքերն աշնանային զորակոչի ընթացքում կհամալրի 1500 քաղաքացի:
Կտրուկ կրճատվել են Վրաստանի պետանվտանգության ծառայությունների համար նախատեսված տեղերը, ընդամենը՝ 20 զորակոչիկ: Ուժային կառույցներում զորակոչ անցկացվում է տարվա մեջ երկու անգամ՝ գարնանը և աշնանը:
| Կառույցը | 2016-1 | 2016-2 | 2017-1 | 2017-2 |
| ՊՆ | 1000 | 0 | 1400 | 1500 |
| ՆԳՆ | 720 | 1250 | 865 | 1225 |
| Պրոբ. | 1020 | 1103 | 1000 | 1280 |
| ՊԱԾ | 443 | 0 | 422 | 20 |
| Ընդհ | 3183 | 2353 | 3687 | 4025 |
Հիշեցնենք, որ Վրաստանի ԶՈւ շարքերում զորակոչը վերականգվել է երկրի պաշտպանության նախարար Լևան Իզորիայի որոշմամբ: Լևան Իզորիային նախորդող Թինաթին Խիդաշելին իր պաշտոնավարման վերջին օրերին չեղարկել էր Վրաստանի ՊՆ կազմում 2016 թվականի երկրորդ զորակոչը, սակայն ներկա նախարարը նշանակվելուց անմիջապես հետո վերականգնեց այն:
Անհրաժեշտ մարտական պատրաստության բացակայությունը և «զորակոչիկների ծառայության ստրկային պայմանները» պարտադիր զինվորական ծառայության դեմ Խիդաշելիի գլխավոր փաստարկներից էին:
Լևոն Իզորիայի պաշտոնին նշանակումից հետո զանգվածային բարեփոխումներ են իրականացվել, այդ թվում նաև՝ հեռացումներ: Արդյունքում վրաստանցի զինվորականների խոսքով՝ միջոցներ են խնայվել զորակոչիկների մարտական պատրաստության աստիճանի բարելավման համար: Հենց սրանով է պայմանավորոված զորակոչիկների և զինծառայողների համար Վրաստանի զինված ուժերի շարքերում նորամուծությունները:
Առաջին հերթին երդման արարողությունից հետո վրաստանցի զորակոչիկները կանցնեն մարտական պատրաստության երեքամսյա դասընթաց, նմանօրինակ դասընթաց անցնում են նաև պայմանագրային զինծառայողները: Ծառայության ժամկետը նույնպես փոխվել է. 15 ամսվա փոխարեն այժմ ծառայությունը կտևի 12 ամիս: Ծառայության ընթացքում ամեն օր նույնպես նախատեսված են մարտական պատրաստության դասընթացներ:
Վրաստանի զինված ուժերի ընդհանուր թվաքանակը գնահատվում է շուրջ 20 հազար զինծառայող, իսկ ընդհանուր թվաքանակը չի կարող գերազանցել 37 հազարը: