Հուլիսի 29-ին Իրանի խորհրդարանի արտաքին քաղաքականության և ազգային անվտանգության կոմիտեն արտահերթ նիստ է հրավիրել քննարկելու «Տարածաշրջանում ԱՄՆ ահաբեկչական և արկածախնդիր գործողություններին դիմակայելուն» ուղղված օրինագիծը։ Այս մասին տեղեկացնում է իրանական «ԻՍՆԱ» լրատվական գործակալությունը։
Օրինագիծը հաստատվել է կոմիտեի բոլոր անդամների կողմ քվեարկությամբ։
Իրանի խորհրդարանի ազգային անվտանգության կոմիտեն հրավիրելու է նաև մեկ այլ արտահերթ նիստ՝ քննարկելու օրինագծի մանրամասները։
Կոմիտեի ղեկավար Ալաեդդին Բորուջերդիի խոսքերով՝ քննարկվելու են նախագծի հետ կապված առաջարկները, որոնք հաստատվելու դեպքում կավելացնեն օրինագծին, ինչից հետո օրինագիծը նորից կդրվի քվեարկության և հաստատվելու դեպքում կդառնա օրենք։
Ավելի վաղ՝ հուլիսի 18-ին, Իրանի խորհրդարանի բաց նիստում հաստատվել էր «Տարածաշրջանում ԱՄՆ ահաբեկչական և արկածախնդիր գործողություններին դիմակայելուն» ուղղված օրինագիծը։ Այն ընդունվել էր ձայների 213 կողմ, 6 դեմ և մեկ չեզոք հարաբերակցությամբ։
Օրինագծով սահմանվում են ԱՄՆ «ահաբեկչական, ահաբեկիչներին աջակցող, մարդու իրավունքները խախտող գործողություններին» դիմակայելուն ուղղված քայլեր։
Նախատեսվում է նաև երկրի հրթիռային արտադրության զարգացման համար հատկացնել 1000 մլրդ թուման (308 մլն դոլար), ևս 1000 մլրդ թուման պետությունը պարտավորվում է Իրանի իսլամական հեղափոխության պահապանների կորպուսի (ԻՀՊԿ) «Ղոդս» ստորաբաժանմանը տրամադրել։
Ավելի վաղ ԱՄՆ Ֆինանսների նախարարությունը պատժամիջոցներ է սահմանել իրանական Shahid Hemmat Industrial Group (SHIG) ձեռնարկությանը առնչակից 6 ընկերության նկատմամբ՝ ի պատասխան «Իրանի սադրիչ գործողություններին, ինչպիսին է «Սիմորղ» կրող հրթիռի փորձարկումը»:
Մինչ այդ ԱՄՆ Սենատը հաստատել էր Իրանի նկատմամբ պատժամիջոցներ կիրառելու օրինագիծը: Օրինագծով պատժամիջոցներ են սահմանվում բոլոր նրանց նկատմամբ, ովքեր աջակցում են Իրանի բալիստիկ հրթիռների զարգացման ծրագրին: «Ահաբեկիչներին աջակցելու» մեղադրանքով պատժամիջոցներ են նախատեսվում նաև Իրանի իսլամական հեղափոխության պահապանների կորպուսի նկատմամբ (ԻՀՊԿ):
Ըստ օրինագծի՝ ԱՄՆ նախագահը կարող է պատժամիջոցներ սահմանել այն անձանց նկատմամբ, ովքեր կաջակցեն Իրանին կամ Իրանից արգելված սպառազինության (տանկեր, զրահամեքենաներ, մարտական ուղղաթիռներ, ինքնաթիռներ, ռազմանավեր, հրթիռներ, հրթիռային համակարգեր) մատակարարմանը: