Իրանի բանակի ռազմածովային ուժերի 47-րդ նավախումբը, որը հունիսի 11-ից հերթապահություն էր իրականացնում միջազգային ջրերում, կայանել է Օմանի Սալալահ նավահանգստում։ Այս մասին օգոստոսի 1-ին տեղեկացնում է իրանական «Թասնիմ» լրատվական գործակալությունը։
47-րդ նավախմբի հրամանատարի խոսքերով՝ հերթապահության 52 օրերի ընթացքում նավախումբը հետևել և ուղեկցել է 1715 առևտրական նավի և 314 ռազմանավի։
Իրանի բանակի 47-րդ նավախմբում հերթապահում են «Ալբորզ» հրթիռային նավը և «Բուշեհր» թիկունքային ապահովման նավը:
Նավախումբը հերթապահության էր ուղարկվել միջազգային ջրերում բանակի ՌԾՈւ 46-րդ նավախմբի առաքելության ավարտից հետո։
Իրանական ռազմանավերը միջազգային ջրերում հերթապահում են 2008 թվականից։ Ծովահեններից իրանական քաղաքացիական և առևտրային նավերը պաշտպանելու համար նրանք հիմնականում հսկողություն են իրականացնում Պարսից և Ադենի ծոցերում, Կարմիր ծովում։
2008 թվականից ի վեր միջազգային ջրերում հերթապահություն իրականացնելիս Իրանի նավախմբերը 250-ից ավելի բախում են ունեցել ծովահենների հետ:
Ապրիլին Իրանը միջազգային ջրերում հերթապահության էր ուղարկել «Լավան» ռազմանավից և «Սաբալան» թիկունքային ապահովման նավից բաղկացած Իրանի ՌԾՈւ 46-րդ նավատորմը։
Իսկ ավելի վաղ՝ 2016-ի հոկտեմբերին, Իրանի ՌԾՈւ 44-րդ նավախմբին հաջողվել էր Ադենի ծովածոցում հետ մղել իրանական 2 առևտրային նավերի վրա ծովահենների հարձակումները: Ծովահենների մեկ այլ հարձակում նավախումբը կանխել է 2017-ի փետրվարին, Բաբ էլ Մանդեբի նեղուցում։ Իրանի ՌԾՈւ 44-րդ նավախմբի կազմում էր «Ալվանդ» ռազմանավից և «Բուշեհր» թիկունքային ապահովման նավը։