Հուլիսի 29-ին Թուրքիայում ավարտվել է «Բայքար» ընկերության արտադրության «Բայրաքթար» (Bayraktar TB2) անօդաչու թռչող սարքից տեղական հրթիռներ արձակելու փորձարկումները։ Այս մասին հայտնում է թուրքական պետական «Անադոլու» գործակալությունը։
Silahlı Bayraktar TB2 İHA'larımızın yeni seri akıllı mühimmatlar (MAM-L) ile bir haftadır devam eden testlerden görüntüler pic.twitter.com/RtLEsePMDF
— Baykar (@BaykarMakina) July 29, 2017
«Բայրաքթար» ԱԹՍ-ն մասնավորապես փորձարկումներ է անցել թուրքական «Ռոքեթսան» ռազմարդյունաբերական ընկերության արտադրության «Ջիրիթ» կամ MAM-L անվանումը ստացած հրթիռներով։
MAM-L հրթիռները համալրված են լազերային ուղղորդման համակարգով և նախատեսված են մինչև 8 կմ հեռավորության վրա գտնվող ցամաքային թիրախների խոցման համար: Հրթիռների զանգվածը 22,5 կգ է, որից մարտագլխիկը՝ 10 կգ:
Ավելի վաղ՝ 2015-ի դեկտեմբերին, «Բայրաքթար» ԱԹՍ-ն վերջացրել է թուրքական «Ռոքեթսան» ընկերության արտադրության UMTAS հակատանկային հրթիռների արձակման փորձարկումները:
Նշենք, որ Թուրքիայի զինուժը օգտագործում է «Բայրաքթար» ԱԹՍ-ի և՛ հարվածային, և՛ հետախուզական տարբերակները PKK-ի զինյալների դեմ գործողություններում։ Ըստ «Անադոլու» գործակալության՝ զինված ուժերի, ժանդարմերիայի, անվտանգության ծառայության սպառազինությունում առկա է 30 միավոր հետախուզական և հարվածային «Բայրաքթար» ԱԹՍ։
«Բայրաքթար» ԱԹՍ-ի մարտավարատեխնիկական բնութագիրը․
- Գործողության շառավիղը՝ 150 կմ,
- Առավելագույն թռիչքային զանգվածը՝ 650 կգ,
- Օգտակար բեռնատարողությունը՝ 50կգ,
- Առավելագույն արագությունը՝ 222 կմ/ժ,
- Թռիչքի տևողությունը՝ առավելագույնը 24ժ,
- Թևերի բացվածքը՝ 12 մ,
- Երկարությունը 6,5 մետր,
- Սարքը կարող է ինքնուրույն օդ բարձրանալ և վայրէջք կատարել։