Հուլիսի 28-ին թուրքական ռազմարդյունաբերական MKEK ընկերությունը երկրի զինված ուժերին է հանձնել տեղական արտադրության MPT-76 ավտոմատների սերիական արտադրության երկրորդ խմբաքանակը:Այս մասին հայտնում է թուրքական պետական «Անադոլու» գործակալությունը:
Մեհմեթչիք-1
Ավտոմատների հանձման համար արարողություն է կազմակերպվել Քըրքքալեի զենքի գործարանում, որտեղ կազմակերպվում է ավտոմատների արտադրությունը:
Արարողության ընթացքում գործարանի տնօրեն Մեհմեթ Օջաքչիօղլուն հայտարարել է, որ զինված ուժերին մատակարարված առաջին խմբաքանակն ընդգրկել է 200 միավոր MPT-76 ավտոմատ:
«Մինչ այժմ 1680 ավտոմատ ենք հանձնել համապատասխան մարմիններին: Նախագծի շրջանակներում ընդհանուր առմամբ 20.000 ավտոմատ ենք արտադրելու: Մինչև 2018-ի երկրորդ ամիսը ամբողջը կարտադրենք և կհանձնենք», — ասել է պաշտոնյան:
Սակայն նշենք, որ ավելի վաղ Թուրքիայի պաշտպանության նախարարությունը Twitter-ի իր միկրոբլոգում հայտնել էր, որ Թուրքիայի զինված ուժերում արդեն իսկ կիրառվում է 2000 միավոր MPT-76 ավտոմատ և նախատեսվում է 50 հազար ավտոմատ հանձնել զինված ուժերին:
Նշենք, որ սերիական արտադրության առաջին խմբաքանակը զինված ուժերին է հանձնվել 2017-ի հունվարին: Դրանք արտադրվում են «Մեհմեթչիք-1» և «Մեհմեթչիք-2» տարբերակներով:
Նշենք, որ MPT-76 ավտոմատն արտադրվում է գերմանական Heckler & Koch ընկերության HK 417 ավտոմատի բազայի վրա՝ գերմանական ընկերության արտոնագրով: MPT-76-ների արտադրությամբ, ՊԱԳՎ-ի հետ կնքված պայմանագրի համաձայն, զբաղվում են MKEK և Kalekalıp ռազմարդյունաբերական ընկերությունները:
MPT-76 ավտոմատի բնութագրերը
- Տրամաչափը` 7,62 մմ
- Երկարությունը` 920 մմ
- Զանգվածը` 4,1 կգ
- Խոցման արդյունավետ հեռավորությունը` 600 մ
- Խոցման առավելագույն հեռավորությունը` 1200 մ
- 1 րոպեում կարող է արձակել մինչև 650 գնդակ։