Թուրքիայի ժանդարմերիայի 14 գնդապետի շնորհվել է գեներալ-մայորի կոչում: Գեներալ-լեյտենանտի կոչում ունեցողներից մեկին էլ շնորհվել է գեներալ-գնդապետի, իսկ 2 գեներալ-մայորի՝ գեներալ-լեյտենանտի կոչում: Այս մասին հրամանագիրը հուլիսի 22-ին հրապարակվել է Թուրքիայի պաշտոնական տեղեկատուում (T.C. Resmi gazete):
Թուրքիայի ժանդարմերիա
Նույն հրամանագրով՝ ժանդարմերիայի գլխավոր հրամանատարի տեղակալ, բանակի գեներալ Իբրահիմ Յաշարը և ժանդարմերիայի գեներալ-մայոր Ալի Օզքարան հուլիսի 24-իս սկսած թոշակի են ուղարկվել:
Գեներալ-գնդապետի կոչում ստացած Ալի Չարդաքչըն և գեներալ-լեյտենանտ Մուսա Չիթիլը նշանակվել են ժանդարմերիայի գլխավոր հրամանատարի տեղակալների պաշտոններում:
Հիշեցնենք, որ 2016-ի հուլիսի ռազմական հեղաշրջման փորձից հետո Թուրքիայի ժանդարմերիան ամբողջությամբ դրվել է ներքին գործերի նախարարության ենթակայության տակ: Մինչ այդ, ժանդարմերիան պատերազմական վիճակներում ենթարկվում էր ԶՈւ գլխավոր շտաբին, իսկ խաղաղ պայամաններում ՆԳ նախարարությանը:
Ռազմական հեղաշրջման փորձից հետո բազմաթիվ զինծառայողներ են ձերբակալվել և հեռացվել նաև ժանդարմերիայի հրամանատարությունից: Այնուհետև ժանդարմերիայում զինծառայողների պակասը լրացնելու համար հրամանատարությունը հայտարարել էր 10000 նոր զինծառայողի ընդունելության մասին: