Հուլիսի 23-ի երեկոյան Սիրիայի հյուսիսարևմտյան Իդլիբ քաղաքում պայթուցիկներով բեռնված մեքենա է պայթել, արդյունքում սպանվել է շուրջ 50 մարդ, այդ թվում նաև զինյալ խմբավորումների անդամներ: Այս մասին հայտնում է ռուսաստանյան «ՌԻԱ Նովոստի» գործակալությունը՝ հղում անելով արաբական «Ալ-Մայադին» հեռուստաալիքի վրա:
Պայթյուն Սիրիայի հյուսիսարևմտյան Իդլիբ քաղաքում. հուլիս 2017
Ըստ աղբյուրի՝ մեքենան պատկանում էր «Թահրիր աշ-Շամ» ահաբեկչական խմբավորմանը, որի զինյալները մեծ մասամբ նախկին «Ան-Նուսրայի ճակատ» խմբավորման անդամներն են:
Նույն օրը Reuters գործակալությունը հայտնել է, որ Իդլիբ քաղաքի մեծ մասը «Թահրիր աշ-Շամ» և «Ահրար ալ-Շամ» խմբավորումների միջև մի քանի օրյա բախումներից հետո ամբողջությամբ անցել է «Թահրիր աշ-Շամ» խմբավորման վերահսկողության ներքո:
Աղբյուրը հայտնում է, որ «Ահրար ալ-Շամ» խմբավորման զինյալները դուրս են եկել նաև Թուրքիայի և Սիրիայի սահմանին տեղակայված Բաբա ալ-Հավա սահմանային անցակետից:
07/23: Hayat Tahrir al-Sham has captured all headquarters of Ahrar al-Sham in #Idlib City pic.twitter.com/LZEJwT1aCK
— toshi (@1zow) July 24, 2017
«Ահրար ալ-Շամը» նախկին «Ան-Նուսրայի ճակատ» խմբավորումից հետո երկրորդ ամենամեծ խմբավորումն է Իդլիբում: Բացի այդ, Իդլիբ նահանգում են կենտրոնացած այլ զինյալ խմբավորումների մեծ մասը, որոնք հրաժարվել են զենքը վայր դնել և միանալ հրադադարի ռեժիմին:
Հիշեցնենք, որ հուլիսի 4-5-ը Ղազախստանի մայրաքաղաք Աստանայում անցկացվել է Սիրիայի ճգնաժամի լուծման համար բանակցությունների 5-րդ փուլը: Դրա ընթացքում պետք է որոշվեին «ապաէսկալացման գոտիները» Սիրիայում, սակայն կողմերը վերջնական համաձայնության չեն հասել: «Ապաէսկալացման գոտիներից» մեկը ստեղծվելու է նաև Իդլիբ նահանգում:
Սիրիայի «անվտանգության գոտիների» մոտավոր սահմանները («ապաէսկալացման գոտիներ»)