Հուլիսի 4-ին Իրանի հարավային Շիրազ քաղաքում պաշտոնապես կայացել է Իրանի իսլամական հեղափոխության պահապանների կորպուսի (ԻՀՊԿ) ցամաքային զորքերի ավիացիոն ստորաբաժանման առաջին ռազմաբազայի բացման արարողությունը։ Այս մասին տեղեկացնում է իրանական «Ֆարս» լրատվական գործակալությունը։
Ռազմաբազան ստացել է «Սեյեդ օլ շոհադա» անվանումը։ Ռազմաբազայում տեղակայվելու են Բելլ-206, Բելլ-209, Բելլ-205, Բելլ-21, Մի-17 ուղղաթիռներ։
Իրանի ԶՈւ ցամաքային զորքերի ավիացիայի «Bell-206» ուղղաթիռը
Ավելի վաղ ԻՀՊԿ ցամաքային զորքերի հրամանատար, գեներալ Մոհամադ Փաքփուրը հայտարարել էր, որ ԻՀՊԿ ցամաքային զորքերի ավիացիոն ստորաբաժանման զարգացման համատեքստում նախատեսվում է արդիականացնել ու թարմացնել ավիացիոն պարկը, ինչպես նաև ստորաբաժանման համար ստեղծել ռազմաբազաներ ողջ երկրի տարածքում։
ԻՀՊԿ ցամաքային զորքերի ավիացիոն ստորաբաժանումը ձևավորվել է 2016 թվականին՝ այաթոլլահ Խամենեիի հրամանով։ 2016-ի ապրիլին նորաստեղծ ստորաբաժանման հրամանատար է նշանակվել Ռահմանի Ղահռուդին։